Footer

ANTOKOY: KANDIDATO PARA MAYOR (Tuloyna)

Awan pay tallopulo a minuto, addaytan ni Pakol a nakasakay iti agkinodkinod a Suzuki 125 a motorsiklona. Naisem a nagturong iti ayan ni Antokoy a kasla nakapon a baka iti nagtugawanna.

“Boss, ania ti parikut ta nasidunget dayta rupam?” impasungadna.

“Saan a nasayaat ti ar-aramiden ti sigud nga amom sika, Pakol!” kinuna ni Antokoy.

“Apay, boss, ania ti inaramidna? Sika a no iyaramidantan iti black propaganda, he! he!” naparagsit nga insingasing ni Pakol.

“Dayta ngarud ti ar-aramidenna ita, Pakol, isu a masapul ti counter punch. Ket sika dayta a a knock out punchko!” kinuna  ni Antokoy.

“Awan danag, boss. Ania ti aramidenta?”

“Umay ditoy dagitay pinaayabak a reporter. Kayatko nga isalaysaymo dagiti inestoriam idi kaniak nga aramid ni Mayor Pallot,” uray la  inradies ni Antokoy ti nakitana a Korean bug iti rabaw  ti lamisaan.

“Aregleyted, boss, basta sika. Ngem agkas adbansnak koma pay laeng iti para sukmon no adda,” inyumbi ni Pakol iti baro nga amona. Kapilitan a dimmutdot ni Antokoy iti dua a tallo ti ulona manipud iti petakana. Dina koma kayat ti mangdadael ngem isu metten ti isupotda no saan a makasiput. Saan a bale ta pudno met amin nga itanawtawto ni Pakol.

Kalpasan ti panagbulallek dagiti dua a taga-media iti aglima kilo a maritangtang nga impaisagana ni Antokoy, inrugidan ti eksklusibo nga interbio.

“Sakbay nga ibuksilak ti gapu no apay a pinaayabankayo, kayatko man ti umapela kadagiti umili a saanyo koma a patpatien dagiti pamadpadakes ti kampo ti kabalubalko itoy numo,” kinuna ni Antokoy bayat ti panangsirigna iti kamera.

“Ania kadi aya ti ibagbagada, apo future Mayor?” sinaludsod ti reporter.

“Ibagbagada a saantayo a kabaelan ti agserbi ta natay laeng kano ti paglaingantayo. Ala wen, maysatayo a balsamador ngem ketdi awan ti inagrabiadotayo. Saantayonto a maalumiim a makisango iti aniaman ti klasena a tao uray pay dagiti kunada nga indigents. Saan a kas kadakuada nga iti laeng tiempo ti eleksion ti pannakaituredda a mapan makilamano kas kada mangungngo kadagiti botante uray no pitakpitak wenno nalang-es dagiti imada. Ti makadakes, napanda pay pinabaklas dagiti postersko kasukat ti sangaribu a pisos. Mabalinyo a damagen iti campaign managerko ta isu ti nakakita.”

Nagtungtung-ed ti nauneg ti panagmatmatana a reporter apaman a sinalaysay ni Batongol ti nakitana nga inaramid ti mayor kadagiti posters ni Antokoy kadagiti dumaya a barangay.

“Ita, adda met ditoy ni Pakol. Isu ti sigud a para aramid iti press release ni Mayor Pallot. Kayatko nga ibinglayna kadakayo ti ammona nga aramid ti sigud a pagserserbianna ken no apay nga ita ket addan a tumultulong kadatayo,” kinuna manen ni Antokoy.

“Ania kadi ti saritaem, Pakol? inamad ti reporter. Impaturong met ti natangken ti ngisitna a cameraman ti kamera iti rupa ni Pakol.

“Diak koman kayat ti agsao yantangay awanak metten iti poderna ngem kakaasinto manen ti ili a Calungonan no agtalinaed ti isu met laeng a pamilia iti turay,” inyintro ni Pakol.

“Ania ti kayatmo a sawen?” sinaludsod ti reporter.

“Idi addaak pay laeng ken  ni Mayor Pallot, kanayon a maisursurotak kadagiti derby a pappapananna sadiay Manila. Umabot iti milion ti maipaabakna iti maysa a rabii. Adda pay daydi innem a bulan nga awan a pulos nangabak dagiti intapogna a manok ngem kasla saan nga agpamarut ti bulsana. Gapu ta kaban ti munisipio ti paggapgapuan ti ipustana! Dayta ti kangrunaan a makaigapu no apay nga agingga ita ket saan pay a nalpas ti pasdek ti tiendaan.”

Inuray ni Pakol a nagnadnad dagiti balikasna sa medio pinapungayna ti matana a  nangsirig iti kamera.

“No ti anakna ti sumaruno nga agmayor, siento porsiento nga agtuloy ti kastoy nga aramid ti mayor. Husto met ti alegasion nga aramid sadiay Recto ti diploma nga ipakpakita ti kabalubal ni Apo Antokoy. Ta apay nga ammok? Gapu ta siak a mismo ti napan nanguyog kenkuana idi napan nagpaaramid iti peke a diplomana iti kina ECE!”

(Maigibusto)

Comments are closed.