Footer

BANNER NEWS: Kandidato ti oposision para kinadiputado, ni Chavit suportaranna para gobernador

VIGAN CITY – Nakurang a dua a lawas sakbay ti eleksion, inwaragawag ti maysa nga opposition candidate para kinadiputado iti maikadua a distrito a saanen a ti kandidatoda para gobernador ti suportaranna no di ti kasupanget daytoy a politiko.

Impakdaar ni Edwin Antolin, Pwersa ng Masang Pilipino (PMP) congressional candidate iti second district ti Ilocos Sur, a saanen a ni dati a bokal Efren Rafanan, Sr., kandidato ti PMP para gobernador, ti suportaranna no di ni dati a gobernador Luis “Chavit” Singson.

Iti interbiona ken ni DWRS anchorman Jun Ramos, kinuna ni Antolin a daytoy ti nagbalin a desisionna gapu iti kapaliiwanna bayat ti panagkampaniana iti maikadua a distrito a “medio agkurkurang” ti pinansial a suporta ni Rafanan kenkuana.

Naammuan ken ni Antolin nga idi damo, adda pondo a naited kenkuana ngem “saan unay a dakkel” ket makitana a “talaga nga agkurkurang” a pagkampaniana.

Kandidato ni Antolin, chairman ti Community Information Assistance (CIA), Santa Lucia Chapter, para diputado iti maikadua a distrito ti Ilocos Sur, kasangona ni Eric Owen Singson, anak ni House Deputy Speaker Eric Singson nga agturposen ti maikatlo a terminona.

Impalgak ni Antolin nga idi napaayaban idi Nobiembre 30 a mapan iti Vigan, naaramiden ti listaan dagiti kandidato ti partido ket isu ti kandidato para diputado iti maikadua a distrito.

Kinunana a “naaramid aminen ket ti la panagpirman” ti inaramidna.

Kinuna ti lider a maysa pay a reflexologist, electrician ken technician, nga imbaga kenkuana ni Rafanan nga addanto substitution kenkuana ngem “awan met ti napasamak” gapuna nga intuloyna ti kandidaturana.

Kinuna ni Antolin nga adda met dagiti panagkuyogda ken ni Rafanan iti motorcade ngem ti pagsakitan ti riknana ti saanna a pannakayam-ammo a kandidato para congressman kadagiti political sortie nga angayenda.

Segun ken ni Antolin, gapu ti kakisang ti suporta ti partido kenkuana, nagdesision a ni Singson ti suportaranna iti masungad nga eleksion.

Innayonna a timmawag ken nagteks kenkuana ni Rafanan ngem saannan a sinungbatan agsipud ta “napuoranen ti nagdalananna a rangtay” ket saanen a mabalbaliwan pay ti desisionna a mangsuporta ken ni Chavit Singson.

Kabayatanna, impeksa ni dati a Deputy National Security Adviser Singson ti panagyamanna ta “nalawlawagan” ni Antolin ken dagiti dadduma pay a lider ti CIA ket nagsublida kenkuana.

Sumagmamanon a nainget a kritiko ni Singson ti napalabas  a pakaibilangan da Nestor Segismundo ken Atty. Tillie Cordero ti nangibatad iti panangsuportada iti dati a gobernador.#

Comments are closed.