Footer

EDITORIAL: Bumotos para iti panagbalbaliw

Intay amin bumotos para iti naan-anay a panagbalbaliw. Saan laeng a panagbaliw ti rupa ti turay ken iti panaglupos ti gobierno no di pay kangrunaanna iti amin para iti panagbalbaliw ti panagbiag ken iti kasasaad ti biag. Iggemtayo, kabukbukodantayo a talged no ania ti intay sasaaden iti masakbayan. Agpannuray dayta a kasasaad iti wagas nga intay panagbutos inton Mayo 10. No kayattayo a balbaliwan ti saan a pulos a nagbalbaliw a kasasaad, nasken ngarud a sangsangkamaysatayo a rummuar ken intay bumotos para iti panagbalbaliw.

Ta saan kadi a daytoy ti naisangsangayan a paniempo nga ur-urayentayo para iti panaglupos ti panagbiagtayo ken nainkappiaan nga awan ti mariknatayo nga aligagaw iti masungad nga al-aldaw?  Saan kadi a daytoy ti tagtagiuraytayo a paniempo a kasapulan met ti intay yaaddang para iti nadurdur-as ken produktibo a kasasaad? Ta saan kadi a daytoy ti panangbalbaliw iti turay a saan a nakaited wenno nangiduron iti dur-asan no di ket naglaeg a kasasaad  a saan a mapangnamnamaan iti masakbayan? Ngarud, itan ti panagtignay.

Wen, rumbeng laeng ti panagbalbaliw. Isu a kasapulan a rummuartayo a mapan bumotos tapno ikur-ittayo iti balota ti butos ti panagbalbaliw. Iti daytoy nga aldaw, panunotentayo koma ti masakbayan dagiti annaktayo.  Panunotentayo ti nadurdur-as ken nasalsaliwanwan a panagbiag. Karbengantayo amin ti agpili iti maitutop nga agtuturay a mangidaulo kadatayo iti nam-ay a kas maiyataday iti panagbiag a mapangnamnamaan wenno panagbiag a nadur-as.

Bumotos kas diktar ti konsensia. Ti idiktar ti konsensia koma ti masurot a saan a ket a bumotos gapu iti diktar ken pagayatan ti sabali. Ti isuratmo iti balota ket katukadna ti masakbayan. Isuratmo ngarud iti balota ti nagan a makatulong kenka ken ti kaadduan. Isuratmo ngarud ti nagan a  mapangnamnamaan para iti naraniag a masakbayan.

Saantayo koma a denggen dagiti panangballaibo a yebkas dagiti addaan iti inasukaran a balikas nga iti udina ket makaipas. Saantayo a denggen dagiti kari dagiti agkarkari iti itayab ti kali ta isuda ti rumbeng nga ublagen ken liklikan a taliawen. Saantayo nga ikaskaso ti lamiong ken boladas dagiti nakasammaked kadagiti armas ta apitentayo met laeng iti udina ti babawi a di manasanas. Saantayo nga ikaskaso ti diaya dagiti aduan iti balitok ta katukadna dayta ti panagnunog a situtuok. Saantayo a pilien ti mangidaulo saan a gapu iti laingna a dumiskurso no di ti laingna nga agserbi ken agtrabaho a kas pinusgan a mangibagi ti ili. Saantayon a pilien wenno taliawen dagiti managkomision kadagiti proyekto ta isuda ti nangirarit iti nakaro a pannakaidagem ti kasasaad. Kangrunaanna, saantayon nga ikur-it dagiti nakaited iti nagan a napait.

Rummuartayo amin a bumotos. Intay balbaliwan ti panagbiag. Itan ti panawen nga intay inur-uray a panagbalbaliw.  Saantayo nga agbuteng, sipipingettayo koma a mangragpat iti nabayagen a kalkalikagumantayo.

Kasapulan ti ili ti panaglupos babaen ti manakem a butos.#

Comments are closed.