Footer

Festivals of the North, plano a maikalawa inton 2011.

DAGUPAN CITY – Gapu iti panagballigi ti kalkalpas a Festivals of the North a naangay ditoy a siudad kas paset ti Bangus Festival 2010, plano dagiti agtuturay ditoy nga ikalawa daytoy a pasalip inton umay a tawen.

Kinuna ni Vice Mayor Belen Fernandez, nagpaay a chairman iti Bangus Festival 2010, a planoda nga open competition ti Festivals of the North inton umay a tawen agsipud iti kaadu dagiti lokal a gobierno iti ruar ti Amianan a Luzon a mayat a makisalip iti nasao nga streetdancing competition.

Dagiti laeng lokal a gobierno iti Ilocos, Cagayan Valley, Central Luzon ken iti Cordillera Administrative Region dagiti nakipartisipar iti kalkalpas a pasalip a naangay ditoy iti tallon a nagsasaruno a tawen.

Nagkampeon ti Barangay Lucao, nangibagi iti Dagupan City, iti Festivals of the North ket inyawidna ti P200,000 a gunggona.

Inyalat ti San Nicolas (Banga Festival) ti maikadua a gunggona ken ti P100,000 a cash prize. Maikatlo a gunggona ti nagun-od ti Laoag City (Pamulinawen Festival) ket immawat iti P75,000.

Maikapat a gunggona ti Masinloc, Zambales (Dinamulag-Mango Festival) ket inyawidna ti P50,000 cash prize idinto a maikalima ti Caoayan, Ilocos Sur (Karawayan-Abel Iloko Festival) ket immawat iti P30,000.

Immawat iti P10,000 consolation prize dagiti amin a nakipartisipar iti kumpetision a pakairamanan ti  Bayambang, Pangasinan (Malansi Festival); Sto. Tomas, La Union (Kimat-Daing Festival); Anda,  Pangasinan (Binongey Festival; Urbiztondo, Pangasinan (Palay Festival);  Pinili, Ilocos Norte (Garlic Festival); Binalonan, Pangasinan (Baon-baon Festival); Umingan, Pangasinan (Rambak-Kalabasa Festival); San Carlos City, Pangasinan (Mango-Bamboo Festival); Pidigan, Abra (Abrenian-Kawayan Festival); San Nicolas, Ilocos Norte (Damili Festival); Infanta, Pangasinan (Mangga Festival);  Dingras, Ilocos Norte (Ani Festival);  ken Baguio City (Panagbenga Festival).#