Footer

INDAYON NI LAGIP: Nagkurusan (Maudi a paset)

“Kayatkon ti aginana,” nakunak. “Di la mabalin nga agsublitan iti beach house?”

“Nasapa pay,” kinuna ni Rodel. “Ken maysa, romantiko ti rabii. Dita koma sayangen dagiti kanito.”

Nariknak ti ima ni Rodel a nairakus iti siketko. In-inut a ginuyodnak agingga a nagdennes ti barukongmi. Diningpil ti bibigna ti bibigko.

Kayatko ti agkitakit ngem kasla awan ti gawayko. Manen, nariknak ti naisalsalumina a bara a nangsallukob iti bagik.

“S-saan,” nakunak idinto a pinasimbengko ti riknak.

“Makabartek ti banglom!” nakuna ketdi ni Rodel.

“Pangngaasim, Rodel…” nakunak.

Ngem ad-adda ketdi nga immirut ti arakup ni Rodel. Nariknak ti imana a simmuksok iti sanguanan ti badok sa nagintek iti barukongko.

Naggulagolak.

“Pangngaasim… Raemem koma ti kinababaik…” nakunak.

“No ay-ayatennak, pagustuannak,” nakuna ketdi ni Rodel. Inrakusna ti takiagna iti siketko sanak inarakup manen. Diningpilna ti bibigko.  Nagdakiwas  ti imana iti bagik. Ngem awanen ti dungngo ti aprosna. Addan kinasabrak ti agekna.

Induronko ni Rodel.

“Isardengmon, Rodel…. No saan, agikkisak!”

“Sige, agikkiska latta. Ti kunam, adda mangarayat kenka? Simmurotka kaniak ditoy, ania ti namnamaem a mapasamak?”

“Kunak no mapagtalkanka, ngem saan met gayam!” nakunak. Timmallikudak tapno agsubliakon iti beach house.

Ngem tinukmaannak ni Rodel. Natuangkami iti kadaratan. Pinilitnak a rabawan iti baet ti panaggulagolko.

Nagikkisak. Nagkatawa ketdi ni Rodel.

“Saanka koman nga agindidi!” nakunana idinto nga inarusibsibnak iti agek.

“P-pangaasim, Rodel…” makasangitakon.

Nagpaggaak ni Rodel. Linettatna ti butones ti shortsko.

Sabalin ti panagkitak ken ni Rodel. Saanen a naamo a rupa ti lalaki nga ay-ayatek no di maysan a sairo a sinallukobanen ti derrep!

Inangayko ti nabatbati pay a pigsak a nagsekkad sako kinugtaran. Naapput ni Rodel ti sellangna.

Inaramatko daytan a gundaway a nagtaray nga immadayo. Saannakon a timmaliaw iti likudak.

Saannak a nagsardeng a nagtaray agingga iti diak nakadanon iti beach house. Masmasdaaw ti rupa dagiti agkakanta iti videoke idi makitada ti langak.

Inasitgak ti manedier ket dinawatko ti tulbek iti kuartomi a babbai.

“Ano ang nangyari sa iyo, Miss?” inamad ti manedier.

“A-awan,” insungbatko. “Adda kadi maarkilak a traysikel nga agpakabesera tatta?

“Meron,” insungbatna. “Uuwi ka na?”

Nagtung-edak. Immangesak iti nauneg. Nakaikeddengakon. Saannak nga agdarum. Ad-adda laeng a maibabainak. Agulimekak lattan yantangay di met nagballigi ni Rodel iti dakes a panggepna kaniak.

Ngem agyamanak ketdi ta ita ta nasapa pay, naammuak ti pudpudno a kinatao ni Rodel.

Manong Danny, dayta ti nagkurusan ti biagko. Iti nagkurusan, naduktalak a saan gayam a mapagtalkan ti lalaki nga inayatko. Ngem saannak nga agladingit no di agyamanak ketdi ta ita ta nasapa pay, naammuak ti pudpudno a kinatao ni Rodel. #

Comments are closed.