Footer

Nakuyem ti tangatang ita, Virginia

Wen, Viriginia, adda pay laeng isisingising ti init. Apay ketdin a saanen? Saan nga agnanayon a nakuyem ti tangatang. Sumingisingto latta met ti init, makitamto inton dumteng ti sirnaat. Saanka nga agbuteng iti idadateng ti sipnget, ta agmulagat ti init inton dumteng ti sirnaat.

Nasipnget dagiti isyo iti agdama. Ulsanda manen ti lubong.  Ti narugit a politika ket kasla nangisit nga ulep a nangbalkot iti tangatang dagiti umili. Dugudog ti pangtana. Kaarigna ti flash flood nga adu dagiti maiyanud iti di maiparbeng ken di umno ket mairaman a madidigra dagiti inosente. Magaburan iti pitak ken lan-ak dagiti rumbeng a gannuat ken prioridad nga aramiden koma para iti dur-asan ti sapasap. Maiyanud iti narungsot nga agus dagiti daan a kari tapno sumangbay manen ti sabali pay a kari – no di man isu nga isu a kari.  Napabaro laeng dagiti isyo para iti maitutop a balikas tapno maiyataday a lamiong.  Saan a maliklikan ti pannakaipasir kadagiti buya a saantayo koma a kayat a mapasamak. Dagiti buya a saan koma a nasken a mangkigtot ken mamutbuteng. Saan a maiparbeng dagitoy a maisubo ken maiduol kadagiti naganus pay nga isip dagiti ubbing. Ta ngamin no ania ti makitada, isu met ti tuladen dagitoy a saringit. No makitada a nakaay-ayat wenno maayatanda la  unay iti mapaspasamak iti las-ud a dida pay la  maawatan ti kinapudno ken no matiliw ti interesda kadagiti pinniltakan iti rupa ken pinnabangsitan iti nagan, di met masasaan nga aramidendanto dayta a banag. Kaay-ayodanto daytoy. Agsipud ta dida pay maawatan dagita, agpisawpisawdanto, saandanto a mamingga a mangkutikot ti pakabuklanna, agingga nga agbalindanto met a tradisional a makibarbarsak ken makipinpinnalapal. Maibilangdanto met a disipulos dagiti ubbaw a garakgak.

Wen, Virginia, nakuyem ti tangatang lalo iti Mayo. Dumteng ti katawa dagiti nagballigi: dagiti tinalek ken intalek ken pinilit a tinalek; dagiti nagsaur ken nagaramid iti madyik tapno maguyodna a tugawan ti trono; naisem pay dagiti nakaliksab kadagiti nabagas unay: dagiti naugingan a nagiggem iti banga, dagiti nangilako iti anniniwan ti sabali, dagiti nagtured a nangallilaw, ken dagiti bullagaw.

Nakuyem ti tangatang ti sumungad a Mayo, Virginia, gapu kadagiti saning-i dagiti saan a nagballigi:  dagiti talaga a di kayat dagiti  umili a pasalsali; dagiti mamati la unay iti bagina a maallilawna ti utekmo; dagiti awanan iti karbengan nga agserbi ta makitan dagiti umili ti agsarsarwa a bulsada idinto ta agmalmalangaka  pay laeng kadagiti naipuruak a kari; dagiti ikkis dagiti di makaawat ken dina  kayat nga awaten nga isuna  ket saan a nagballigi, ngamin, kayatda a subboten ti dakkel unay a nagastosda; dagiti mangipagarup a sinuitik ti kasalisalna. Manayonan manen ti bilang dagiti matmaturog ken binuot a kaso iti sala ni torogis, ken ad-adu manen ti makiraud a pagbagasan, saan laeng a ti napno ti kamaligna no di pay makadkadan met ti agamang ti ili.

A, nakuyem ti tangatang ti Mayo ita, Virginia. Wen, makitam ita dagiti  tinagapulotan a dila. Makitam ita dagiti magmagna a bullagaw nga  umasideg a kunam la no am-ammonaka: makilamano, makisarsarita, makiinnangaw ken makirikrikna iti agdama a rikriknaem. Umayda, wen, bumalaybalay, isuda dagiti balangkantis a propeta ta ti asukar nga agaon kadagiti bibigda ket agbalin nga apro apaman a naidisso iti dilam. Umayda agwagis ken makilamano kadagiti kalkalsada: laglagipennakto, kayong; ne, kasinsin, dinakto liplipatan; dagitay inanaktan ti kasar ken buniag dita, kumpadre, ken kasta met kumadre, bagaam idan a didan isabali pay ti ikur-itda ta ad-adda a datayo ti agsisinnaranay; anakek dayta ubbam ta kuak ti maysa a baboy ken agayabka iti ad-adu nga  umay makipunsion; siak ti ninong (wenno ninang) ta iserrekkonto ida no makatugawak. A, nagadu dagiti kari ken nagadu met dagiti agam-ampayag a kali.

Wen, Virginia, nakuyem ti tangatang ita, ket intay manen asaken dagiti kinelleng, intay manen pilien dagiti bin-i a kapkapnekan: dagiti  bin-i iti nasiit ken nabato a daga, dagiti adda iti igid ti kalsada, dagiti nagtubo iti abay dagiti nadadangkaw a ruot. Isu a napateg la unay ti tunggal inka ikur-it ta dayta ti masakbayam, ti dara ti ilim, ti pataw iti saanen a pannakalung-aw, urbon ti karnero a mangirugi iti nasged a panagbalbaliw saan laeng a para  iti ili no di pay ulidan dagiti  umili.

Saantayo koma a makiraman a makipagparti iti bukod nga ili: natingra dagiti dara, maitaray dagiti naalas-as a lasag. Saantayo a makipunsion kadagiti nangisit a gagem.

Wen, Virginia, sumirnaat pay ti init. Ngem nasken nga utoben a nalaing ti konsensiam sakbay a mangikur-itka. Saanmo nga  ilako dayta karbengam. Saanka a paallilaw kadagiti inasukaran a balikas.

Nakuyem ti tangatang, lalona iti Mayo, ngem iggemtayo ti lampara ti masakbayan, Virginia!#