Footer

“Performance ti nangpangabak kaniak iti eleksion”: Dip. Singson

VIGAN CITY – Kinuna ni Diputado Ronald Singson a ti napintas a performancena iti tallo a tawen a panagserbina ti nangpangabak kenkuana iti panagpailayonna a kas mangibagi iti umuna a distrito ti Ilocos Sur.

“Daytoy a panangabakko iti maikadua a daras iti kinakongresista ket resulta ti tallo tawen a panagtrabahok tapno maipaayko dagiti serbisio a kasapulan dagiti kadistriktuak,” kinuna ni Singson bayat ti inangayna a press conference  idi Mayo  11, maysa nga aldaw kalpasan a naideklara a kas nailayon a kongresista ti umuna a distrito ti Ilocos Sur.

“Makunak itan a nakapanawakon iti anniniwan ti amak a ni Gov. Luis “Chavit” Singson,” kinuna ti ub-ubing a Singson sana innayon a patienna a ti nasayaat a gapuananna ti nangpangabak kenkuana iti maikadua a gundaway.

Nagyaman ni Singson ken ni Bertrand Baterina a kinasalipna para kinadiputado ta gapu kenkuana, nagtrabaho a husto iti panagkampaniana ket “nariing manen” ti gagarna nga agserbi idinto nga innayonna nga itultuloyna ti pulong-pulong kadagiti barangay  “ta makita a direkta dagiti kasapulanda”.

“Inan-anusak ti napan  a mismo kadagiti barbarangay tapno amadek dagiti kasapulan dagiti umili. Babaen ti direkta a pannakiumanko kadagiti tattao maammuak met no ania a talaga dagiti kasapulan a maipaay,” kinuna ni Singson.

Itti umuna a terminona, tinutokan ti diputado ti benneg ti imprastruktura kas kadagiti school buildings, farm to market roads, multipurpose pavements ken dadduma pay a pasdek, ket impatalgedna nga ad-adda a tutokanna dagiti programa a mangpasantak iti turismo ti probinsia kasta metten ti pannakaipaay dagiti kasapulan a livelihood projects para kadagiti umili.

Aminado ni Singson a mas inikkanna iti importansia iti umuna a terminona ti pannakapapigsa ti aliansana iti Metro Manila tapno makaguyugoy kadagiti ahensia a mangpondo kadagiti napapateg a proyektona isu a masansan ti kaawanna ditoy probinsia. Nupay kasta inkari ni Singson a mas balanse itan ti aramidenna a panagpakita kadagiti umili ken ti pannakiumanna kadagiti koneksionna iti Manila.#

Comments are closed.