Footer

Chavit, DV, naiproklama a nangabak a gobernador, bise gobernador

VIGAN CITY – Improklama  ti provincial board of canvassers da Deputy National Security Adviser Luis “Chavit” Singson ken Gov. Deogracias Victor Savellano a nangabak a gobernador ken bise gobernador iti session hall ti provincial capitol idi agarup alas tres ti malem ti Mayo 11, 2010 .

Saggaysa nga ingngato ni Commission on Elections Provincial Supervisor Atty. Marino Salas ti ima ti agabalayan a Singson ken Savellano kalpasan nga impakdaarna a nangabakda a gobernador ken bise gobernador kas maibatay iti resulta ti panagbubutos a naangay ditoy probinsia idi Mayo 10, 2010.

Segun iti resulta ti panagbubutos, nakagun-od ni Singson iti 199,215 a butos kontra iti 107,712 a butos ni Efren Rafanan a kinabalubalna para iti kinagobernador ti probinsia. Agdagup iti 91,503 a butos ti nangitarayan ni Singson ken ni Rafanan.

Naiproklama met a nangabak ni Gov. Deogracias Victor Savellano a bise gobernador iti dayta met laeng a malem.

Ginaburan  ni  Savellano iti butos dagiti kinasangona a da Romeo Hidalgo ken ni Ruben Marzan babaen ti 232,028 a butosna idinto a 24,272 laeng ti nabutos ni Hidalgo ken 12,638 ken ni Marzan.

Iti interbio kenkuana ti media, kinuna ni Singson a tutokan ita ti administrasionna ti agrikultura, kasta metten dagiti agduduma a livelihood projects dagiti organisasion dagiti umili.

“Agtuloy amin a proyekto ni Gov. DV Savellano, nayonantayo pay. Agtultuloy met latta dagiti dadakkel a proyekto imprastraktura,” kinuna ni Singson bayat ti press conference nga inangayna kalpasan a naiproklama a kas gobernador.

Kinuna pay ni Singson nga umuna nga ikkanna iti importansia ti rekonsiliasion kadagiti amin a sektor kalpasan ti eleksion tapno naan-annayas ti panagtaray ti panangidaulona iti probinsia iti sumaruno a tallo a tawen idinto nga inyunay-unayna a  silulukat nga umawat iti nakabalubalna no la ketdi kayatda ti tumulong.

Naiproklama met a nailayon a diputado iti umuna a distrito ti probinsia  ti anak ni Singson a ni Cong. Ronald Singson ken ti anak ni Deputy House Speaker Eric Singson a ni Eric Owen Singson Jr. a nangabak  a diputado iti maikadua a distrito.

Kabayatanna, naiwaragawag dagiti agtugaw a kameng ti hunta probinsial:

Umuna a Distrito: Christian Purisima, Jeremias Singson, Ismael Baterina, Ronie Rapanut ken Orlino Tesoro.

Maikadua a Distrito: Charmian Wyaneth Zaragoza, Robert Tudayan, Joselle Gironella, Jose Bunoan Jr. ken Teresita Cordero

Awan ti nakalusot a kandidato ti oposision para iti kinabokal iti kalkalpas nga eleksion.#