Footer

Dagiti Marcos, nagsublida iti turay

LAOAG CITY –  Kagiddan ti panangabak ti anak daydi dati a Senador Benigno Aquino, Jr. a kas presidente ti pagilian, agsubli met iti turay ti asawa daydi nag-Presidente Ferdinand Marcos, Jr. ken dagiti annakna.

Kas maibatay iti resulta ti eleksion iti Ilocos Norte, masiguradon ti panangabak da dati a First Lady Imelda Marcos,  Maria Imelda “Imee” Marcos, ken  ni Ferdinand “Bongbong” Marcos, Jr.

Nagkandidato ni Imelda a para congresswoman iti maikadua a distrito ti Ilocos Norte idinto a nagkandidato ni Imee para gobernador ti probinsia ken ni Bongbong para senador.

Inluges ti dati a First Lady ni Atty. Mariano Nalupta, Jr. a kinabalubalna iti kinadiputado.

Inabak ni Imee para gobernador ni incumbent Gov. Michael Marcos Keon.

Iti pannakaisurat daytoy, adda ni Bongbong iti maikapito a puesto iti kinasenador. Sangapulo ket dua dagiti mabutosan a senador.

Nagkandidato dagiti Marcos iti babaen ti Nacionalista Party-Kilusang Bagong Lipunan. Ni Sen. Manuel Villar ti sinuportaran dagiti tallo. Iti agdama nga isaysayangkat ti Comelec a canvass ti butos para iti kinapresidente, adayon ti nangitarayan ni Sen. Benigno “Noynoy” Aquino III ken ni Villar.

Inawaten ni Villar ti pannakaabakna ken inwaragawagnan ti panangdakulapna ken ni Aquino.

Maipalagip a daydi nag-Senador Benigno Aquino Jr., ama ti sumaruno a Presidente ti pagilian, ti kangrunaan a kritiko daydi nag-Presidente Ferdinand Marcos.

Idi impakdaar ni Marcos ti martial law babaen ti Proclamation No. 1081 idi Setiembre 21, 1972, maysa kadagiti naibalud ni Aquino.

Napalubosan ni Aquino a pimmanaw iti pagilian gapu iti sakitna iti puso. Naggianda iti pamiliana iti Boston iti tallo a tawen.

Naggawid ni Aquino ditoy pagilian idi Agosto 21, 1983, ngem napapatay iti tarmac ti Manila International Airport (Ninoy Aquino International Airport itan). Pinaglibakan dagiti Marcos ti alegasion a ti strongman ti adda iti likudan ti pannakapapatay ni Aquino.

Nagpaawag ni Marcos iti snap elections idi 1986 ket nagsangoda ken ni Corazon Aquino. Nangabak ni Marcos ngem kimmaro ketdi dagiti rali ken protesta gapu iti mapapati a panagsuitik iti eleksion a  simgiaban ti Edsa Revolution idi Pebrero 22, 1986 a nagtungpal iti pannakapadisi ni Marcos iti puestona tallo nga aldaw kalpasanna.#

Comments are closed.