Footer

EDITORIAL: Saludarantayo ti automated election iti pagilian

Iti napalabas nga isyo ti Tawid News, sinaludsodmi: kasano kasagana ti Commission on Elections? Nadakamatmi daytoy agsipud ta manipud idi naipasan a linteg ti poll automation,  nakitami dagiti “kapalpakan” ti poll body iti panagsaganana para iti daytoy kabarbaro a wagas a panangpili kadagiti mangiggem iti rienda ti pagilian.

Impetteng ti Comelec nga iwaywayatda amin dagiti addang ken measures tapno agbalin a naballigi ti eleksion. Ngem nakitami ti kinakurang ti panagsagana ti poll body, kas iti di naan-anay a field test kadagiti makina a maaramat iti panagbubutos, ti kinatalged ti sistema ti pannakaipatulod ken pannakabilang dagiti butos, ti problema ti elektrisidad ken ti potensial a pannakamanipular ti sistema wenno panagpalia dagiti makina a yam-amak nga agtungpal iti failure of elections.

Nadegdegan ti amakmi idi nagpalia dagiti PCOS idi matesting dagitoy, kas iti saanda a pannakabasa dagiti butos, sabali ti basaenda, saan nga agpada ti bilang dagiti nagbutos ken iti iyimprentada a  nagbutos, ken dadduma pay. Kapilitan a pinaisubli ti Smartmatic amin dagiti naipatuloden a CFCs tapno ma-reconfigure dagitoy.

Gapu kadagitoy nga aberia, indawat payen dagiti dadduma a sektor ti pannakaisanud ti eleksion iti uray dua a lawas tapno naan-anay a maisagana ti Comelec dagiti mapaliiw a pagkamtudanna. Ngem iti baet dagitoy a pammabalaw, impetteng ti Comelec a maituloy ti eleksion.

Natuloy ngarud ti eleksion itay Mayo 10.

Rimsua dagiti inam-amak dagiti umili. Adu dagiti nagdadael a PCOS. Adu a botante ti di nakabirok ti presinto a nagbutosanda gapu ta napagbalin metten dagitoy a cluster precincts. Atiddog ti pila dagiti agbutos gapu ta immadu ti nagbalin a botante kadagiti presinto. Adu dagiti nabisinan, nautoyan ken tumanabutob.

Kalpasan ti panagserra ti panagbubutos iti alas siete, adu ti nasdaaw iti kapardas ti pannakabilang dagiti butos dagiti kandidato ken iti pannakaipatulod ti resulta iti Manila.

Iti sakbay ti alas dose, nabilangen ti nasurok a 40 porsiento iti kadagupan a butos ti para presidente, bise presidente ken dagiti para senador. Iti met biang ti lokal, sakbay ti tengnga ti rabii, adun ti naiproklama a nangabak a kandidato.Iti sumuno a bigat, naiwaragawagen ti resulta ti eleksion iti kadagupan nga 80 porsiento.

Iti historia ti politika ti pagilian, nga agpaut ti panagbilang iti mano a lawas sakbay a maammuan ti nangabak iti nasional a posision, maysa daytoy a bindikasion iti Comelec. Kayarigan ti Comelec ti mannakigubat a  naipasungalngal iti dakkel a ranget ngem nagballigi a nangiyawid iti dayaw ti pagilian.

Iti daytoy a gundaway, dakulapentayo ti Comelec.  Iti daytoy a gundaway, awan ti nabaelan dagiti mahikero iti numero ken dagiti suitik a kandidato a manggamulo iti pudpudno a karirikna dagiti botante. Daytoy laengen ket ibilangmi a dakkel a gapuanan ti umuna nga automated elections a maiwayat ditoy pagilian.#

Comments are closed.