Footer

KOMENTARIO: Panangsango iti Kinapudno

Itay laeng laeng nabiit, nagragsak dagiti minilion a bakla iti panangpabor ti Korte Suprema iti petision ti party-list nga “Ang Ladlad” nga idauluan ni Danton Remoto kontra ti Commission on Elections. Nagramut ti kaso iti saan a panangibasura ti Comelec iti akreditasion iti “Ang Ladlad” a kas maysa a political party para iti eleksion idi Mayo 10.

Iti umuna a resolusion ti Comelec’s Second Division idi Nobiembre 11, 2009, imbilinna ti pannakaibasura ti akreditasion ti “Ang Ladlad”. Sinegundaan ti Comelec En Banc  ti pinal a pangngeddeng idi Disiembre 17, 2009.

Kangrunaan a makagapu nga imbasura ti Comelec ti akreditasion ti “Ang Ladlad” ti saan a nasayaat nga ehemplo ti homoseksualidad kadagiti agtutubo. Inaramat pay ti Comelec dagiti teksto manipud iti Biblia ken iti Koran a kas nagibasaranda iti pangngeddengda.

Ngem nagkamang ti “Ang Ladlad” iti kangatuan a korte tapno tuntonenda ti kalinteganda a makipartisipar iti eleksion kas party-list. Ket idi Enero iti daytoy a tawen, pinatgan ti Supreme Court ti arungaing daytoy kalpasan nga inadalna a nalaing dagiti argumento ken kontra argumento. Iti pangngeddeng a pinirmaan ni Supreme Court Justice Mariano del Castillo, imbilinna iti Comelec a nasken a maited ti akreditasion iti party-list “Ang Ladlad” ta natungpalna met  amin a legal a kasapulan a kas nadakamat iti Republic Act 7941 wenno ti Party-list System Act.

“We are not blind to the fact that, through the years, homosexual conduct, and perhaps homosexuals themselves, have borne the brunt of societal disapproval. It is not difficult to imagine the reasons behind this censure – religious beliefs, convictions about the preservation of marriage, family, and procreation, even dislike or distrust of homosexuals themselves and their perceived lifestyle. Nonetheless, we recall that the Philippines has not seen fit to criminalize homosexual conduct,” kinuna ti Korte Suprema.

Iti biangmi, bulsek ti Comelec ta saanna a makita wenno annugoten a silulukaten a nabayag ti ridaw kadagiti homosexual. Nabayagen nga inakseptar ti gimong ti timekda kas umili. Kas kuna ti Korte Suprema, saanda a bulsek iti kinapudno.

Iti pay laeng damo a sigwada ti panagsisinnukat dagiti argumento ken kontra argumento, ngimmaton  ti kiday dagiti saan a bulsek iti kinapudno, kas iti maysa met a sektor ti gimong wenno sosiedad, ti LGTB (lesbians, gays, bisexuals and transgenders). Kas maysa a sektor ti gimong, rumbeng laeng a mangngeg met ti timekda ken maaddaanda iti nawaya a pannakipartisipar iti pagdur-asan ti gimong a paggargarawanda. Nasken a makipaggamuloda iti gimong ta pasetda met iti gimong. Adu dagiti kameng ti “Ang Ladlad” aglalo no iraman pay dagiti “di nagladlad” iti kinaasinoda.

Kuna ti Comelec iti argumentoda a nagaduda la ngaruden nga agtakem iti gobierno. Ngem saan nga inayonan dayta ti “Ang Ladlad”. Aduda ngarud ngem awananda iti mangibagi kadakuada sadiay kongreso,  kayariganda ti maysa nga umel nga awanan iti timek. Isu a kasapulan ti kinaadda ti political party dagitoy.

Ti pannakaareditar ti grupoda a kas political party ti agbalin a ridaw tapno maipangegda dagiti arungaingda. Rumbeng laeng dayta agsipud ta nabayagen a silulukat ti ridaw ti sosiedad wenno gimong para kadagiti amin nga LGBT. Saan a maigapu iti immoralidad ti isyo ditoy kas nagbasaran ti Comelec no di ti karbenganda a kas aktibo nga umili a makipaspaset a kanayon iti dur-asan ti gimong.

Maysa ngarud a panaglabsing iti fundamental rule iti civil ken political rights no ibasura ti akreditasion ti “Ang Ladlad,” kas kuna ni Chief Justice Reynato Puno.

Kuna ti Comelec nga irespetoda ti pangngeddeng ti kangatuan a korte. Ket nairamanen ti “Ang Ladlad” a pagpilian kadagiti party-list a makigamulo iti pagpandayan-linteg iti pagilian.

Barbareng ta maikkan ti gundaway dagiti bakla wenno homoseksual a maaddaan iti timek iti Kongreso.#