Footer

Mayo 10, 2010 elections: ari-ari dagiti Singson iti politika iti Ilocos Sur

VIGAN CITY – Iti daytoy kalkalpas nga eleksion, pinatalgedan dagiti Singson nga isuda ti ari-ari ti politika ditoy probinsia iti Ilocos Sur ket awan ti makita iti asideg a masakbayan a natibker a politiko a makabael a mangdupir iti bilegda.

Iti maikadua a gundaway, pinadas ni dati a Bokal Efren Rafanan, Sr. a dupiren ni Gov. Luis “Chavit” Singson, ti langilangan a politiko a nangpadakkel kenkuana, ngem ad-adda a naisualit iti daytoy a panagpipili.

Iti immuna a panagsango da Rafanan ken ni Gov. Singson, ginaburan ti naud-udi ti bokal iti diperensia a nasurok a P43,000 a butos.

Iti daytoy kaunaan nga eleksion babaen ti automation, nakagun-od ni Chavit iti 199,215 a butos idinto a 107,712 laeng ti nabutos ni Rafanan wenno iti diperensia a 91,503 a butos.

Iti daytoy a panangabak ni Singson, impamatmatna manen a Singson country ti Ilocos Sur ket kasla dalapusen ti allawig ti asinoman nga agtakder iti dalanda.

Ad-adda itan a nabilbileg dagiti Singson agsipud ta nailayon ni Cong. Ronald Singson a diputado a mangibagi iti umuna a distrito ti probinsia. Ni Ronald ti masirmata a kangrunaan a mangitag-ay iti nagan  ni Chavit Singson ken agbalin a kas iti amana a kabilegan a politiko iti Ilocos Sur.

Timmapog metten iti politika ti sabali pay nga anakna, ni Ryan Luis. Nabutosan a para bise mayor iti Vigan City ni Ryan Luis nga awan ti simmango kenkuana. Ikutna ti personalidad ti maysa a nangato a dadaulo, manamnama a saan laeng a kinabise mayor ti pagpatinggaan ni Ryan Luis iti masakbayan, aglalo ket naikamang iti pamilia ti Savellano, maysa kadagiti teddek a politiko iti Cabugao, Ilocos Sur. Idi Pebrero 27, daytoy a tawen, inkallaysa ni Ryan ni dati a Patricia Savellano, anak ni nabutosan a Bise Gobernador Deogracias Victor Savellano. Iti panagbalin a maymaysa a pamilia ti Singson ken Savellano, ad-adda a timmibker ken immuneg ti pondasion ti bilegda iti politika iti probinsia.

Nabutosan met a provincial board member ti sabali pay a Singson, ni dati a Bise Gobernador Jeremias “Jerry” Singson.

Maysa ita a kabangluan a politiko iti siudad ti Vigan ni Mayor Eva Marie Singson-Medina, anak daydi naggobernador Evaristo “Titong” Singson, kabsat ni Chavit Singson. Nailayon ni Mayor Eva nga awan ti nakaitured a simmango kenkuana gapu iti maipagpannakkel a nagapuananna iti panaglupos ti Vigan manipud iti maysa nga ordinario nga ili ket nagbalin a maysa kadagiti kangrunaan a tourist destinations iti Amianan a Luzon.

Sabali pay a Singson, ni dati a konsehala ti Vigan City Germy Singson-Goulart, kabsat ni Chavit, ti nangabak a mayor iti Caoayan, Ilocos Sur. Kinasango ni Goulart ni Atty. Tito Tugade, kabsat ni Mayor Mario Tugade a nangibalat ken ni Goulart iti eleksion idi 2007.

Iti met maikadua a distrito ti baluarte ni Deputy House Speaker Eric Singson, kasinsin ni Chavit Singson, a saan a madupir dagiti kasupangetna iti politika.

Nangabak ni Eric Owen Singson, a kas mangibagi iti maikadua a distrito ti Ilocos Sur.  kas ken ni Cong. Ronald Singson, ni Eric Owen ti masirmata a mangitag-ay iti nagan ti Singson iti maikadua a distrito ti probinsia agsipud ta ikutna ti nagan ti langilangan iti politika nga amana.

Nailayon met ni Candon City Mayor Allen Singson iti puestona agraman ti katiketna para bise mayor a ni Alfonso Singson. Anak ti diputado ni Allen idinto a kabsatna ni Alfonso. Sabali pay a Singson, ni Kristelle, kaanakan ni Eric, ti nabutosan a konsehal ti siudad.

Iti Narvacan, awan ti kinasango para iti kinamayor ni Bokal Zuriel Zaragoza, anak da Mayor Edgar Zaragoza ken Vice Mayor Charito Singson-Zaragoza, sabali pay a kabsat ni Eric. Uray ni Charito Singson-Zaragoza ket awan ti kinasangona. Nangabak met a konsehal ni Avel Verney Zaragoza, kaanakan ni Mayor Edgar.

Nangabak met a para bokal iti maikadua a distrito ni Atty. Charmian Wyaneth Zaragoza, anak dagiti Zaragoza.

Iti panangabak ni Wyaneth Zaragoza, kaduananto ni Bokal Jeremias Singson iti sangguniang panlalawigan.#

Comments are closed.