Footer

Politika, pagsisinaan dagiti agkakabsat

VIGAN CITY – Iti politika, awan ti permanente nga aggayyem, ti laeng bukod nga interes tunggal politiko ti permanente. Ti pay politika ti kangrunaan a pagsisinaan dagiti agkabsat, agkakasinsin, aguliteg ken dadduma pay nga agkakabagian, lalo no saan nga agpabus-oy ti maysa iti tarigagay ti sabali.

Maarisit ti kinapudno daytoy iti kalkalpas nga eleksion ditoy probinsia.

Maysa a nakaiturongan ti imatang ti media iti Santiago, Ilocos Sur ta agkaapeliedo dagiti nagsasango para iti kinam-yor ken bise mayor a no saanka a residente ditoy, posible a maulawka no sino ti sino.

Iti daytoy nga eleksion, kinabalubal da Mayor Josefino Miranda ken ti anakna a ni Michael Miranda da Joselito Miranda, Sr., ken ti anakna a ni Joselito Miranda, Jr. Nagalus-os ni Mayor Josefino Miranda a para bise mayor agsipud ta maturposnan ti maikatlo a terminona ket ti anakna a Michael ti nagkandidato a para mayor. Iti sabali a bangir, nagtaray ni Joselito Miranda, Sr. a para mayor idinto a para bise mayor met ti anakna a ni Joselito, Jr.

Imbalat da Michael ken Josefino da Joselito, Sr. ken Jr. Nupay kasta, adda konsuelo dagiti naabak, nagwagayway ni Louella, asawa ni Joselito, Sr. kas konsehal.

Maysa pay a nakaiturongan ti imatang dagiti agpalpaliiw iti politika ti panagsango ti agkabsat a Purisima, da Atty. Mark Purisima ken ti kabsatna a ni Tito Purisima para iti kinamayor iti San Ildefonso, bassit nga ili iti amiananen ti Vigan City.

Pagarian daytoy dagiti Purisima. Ngem politika ti maitudtudo a nagsisinaan dagiti agkakabsat.

Idi 2007, nagsango iti kinamayor da Atty. Mark Anthony Purisima ken ni Christian Purisima, sabali pay nga anak da Bokala Chuchi Purisima. Mapapati a nagramut ti “panagsakit ti nakem” ni Mark iti panangpili da Bokala Chuchi ken ni Christian a kumandidato a para mayor idinto nga impeksan ti abogado ti tarigagayna nga agkandidato iti dayta a puesto.

Naabak ni Mark. Maysa met laeng a Purisima, ni Amante II, ti nangabak a bise mayor.

Iti panagturpos ti maikatlo a termino ni Bokala Chuchi, nagkandidato ni Mayor Christian a para bokal iti probinsia. Ni Amante II ti kimmandidato a para mayor ngem saan a nalapdan da Bokala Chuchi ti panagkandidato manen ni Mark a para mayor.

Nagpiestaan dagiti agnaed iti probinsia daytoy “telenobela” a naipatangatang pay iti radio mainaig iti saan a panagkikinnaawatan ti pamilia Purisima a nagramut iti politika.

Iti daytoy nga eleksion, insualit ni Mark ni Amante II a kabsatna.

Maysa a saludsod ti agay-ayuyang iti panunot dagiti tattao, aglalo dagiti agindeg iti San Ildefonso: iti panangabak ni Mark, itanggayana kadi metten ti rekonsiliasion iti inana ken kakabsatna?

Maysa pay a sinursurot ti media ti resulta ti eleksion iti Cabugao, Ilocos Sur no sadino a nagsasango da Dr. Chita Suero, Vice Mayor Rex Morales, Edgardo Cobangbang, Jr., ken Lalaine Apostol-Recasata.

Maysa a nangkulding iti interes ti media ti panagsina ti dua a nasinged nga agkapartiduan, da Mayor Diocaesar Suero ken ni Vice Mayor Rex Morales gapu iti politika.

Agturposen ni Suero gapu ta maikatlo a terminonan kas mayor, ket kas bise mayor, ninamnama ni Morales nga isu ti ibayog ni Suero a kandidato ti partido. Ngem “gapu ta isu ti kayat dagiti kakapitan ti barangay”, ni Dr. Chita nga asawana ti naipatakder a kandidato a para mayor ket kapi-litan a nagbirok ni Morales kadagiti bukodna a kandidato.

Nagtungpal a dua nga agkapartiduan ti nagsangdo iti eleksion, banag a nangpakapsut iti kandidatura dagitoy ken nakadalebanda nga agpada.

Ni Cobangbang ti nagsagrap iti imbag iti daytoy a panagsina dagitoy agkasinged idi a politiko. Ita, isun ti binutosan dagiti umili a sumaruno a mayorda.#