Footer

Pondo ti RA 7171, imposible a tipden ni Aquino: Chavit

VIGAN CITY – Kinuna ni governor-elect Luis “Chavit” Singson nga imposible a tipden ni president-elect Benigno Aquino III a maruk-atan ti pondo manipud iti excise tax ti tabako agsipud ta dagiti tattao ti madusa.

Kinuna ni Singson nga imposible a tipden ni Aquino ti pannakaruk-at ti bingay ti probinsia manipud iti RA 7171 agsipud ta saan nga isu ti madusa no di dagiti tattao.

Impalgak ti gobernador nga ad-adu ti naipit a pondo ti RA 7171 iti babaen ti administrasion ni Pres. Gloria Macapagal-Arroyo agsipud ta nairaman ti pagilian a napuntaan ti economic crisis iti sangalubongan.

“Uray no kasta, napintas met ta nairuartayo met laeng amin,” kinuna ni Singson.

Idi apagtapog ti Pebrero, pinaruk-atan ni Pres. Arroyo dagiti di naited ti national government a bingay dagiti tobacco producing provinces iti excise tax ti tabako nga agdagup iti P6 bilion.

Nakabingay ti Ilocos Sur iti agdagup iti P3 bilion gapu ta ti Ilocos Sur ti kadakkelan ti produksion kadagiti probinsia nga agmulmula iti tabako.

“Imposible a tipdenna daydiay ta saan a siak ti madusa, dagiti tattao ti madusa,” kinuna ni Singson idi masaludsod kenkuana no adda posibilidadna a tipden ni Aquino ti pondo manipud iti RA 7171 gapu ta ni Sen. Manny Villar ti sinuportaran ni Singson.

Inlupek ni Aquino dagiti kinasangona para presidente a pakairamanan ni Villar iti baet ti bilion a nagasto daytoy iti kampania.

Kinuna met ni congressman-elect Ronald Singson a daydi nag-Presidente Corazon Aquino ti nangaprobar iti nasao a linteg ket awan ti gapuna a saan a suportaran ni president-elect Noynoy Aquino.

Iti dayta met la nga interbio, kinuna ni Singson a madadaan nga awatenna ni dati a Bokal Efren Rafanan, Sr. iti nagan ti rekonsiliasion ngem saan daytoy nga agserbi a sigida.

“Masapul a reconciliation with sincerity. Lipatenna ti bukodna nga interes, panunotenna ti pagimbagan ti kaaduan,” kinuna ti gobernador.

Sakbay ti eleksion, imbatad  da Atty. Tillie Cordero ken Nestor Segismundo, napinget idi a kritiko ni Singson, ken ni Edwin Antolin, kandidato ti oposision para diputado iti maikadua a distrito, ti panangsuportada iti political kingpin ti Ilocos Sur.#