Footer

SALAYSAY: Production manager idi, mannalon itan (Maudi iti dua a paset)

Idi kalkalpas ti Bagyo Pepeng, nagmula ni Manang Felidel iti paria iti 1,200 metro kuadrado a sinilong. Gimmasto iti P8,000 iti panagpatakder iti pagpakalatkatan a kawayan, P600 iti bukel ken mapan a P15,000 iti panagpatrabaho (labor). Agingga ita pagap-apitanna pay laeng dagiti mulana ket nakaganaren iti aganay P45,000.

Gapu ta nattuang dagiti mulana a papaya idi Bagyo Pepeng, binaliwanna ti nagmula iti 90 a kapuon iti 1,300 metro kuadrado a talon idi Enero. Naggapu sadiay Taiwan dagiti bukel ti papaya nga inusarna. Kalpasan ti innem a bulan wenno inton Hunio, mangrugin nga agbunga dagitoy. Iti umuna a panagbunga, gagangay kano a P500 ti paglakuan iti bunga ti kada pinuon. Nalawag ngarud a P45,000 ti paglakuanna iti 90 a pinuon a mulana. Iti sumarsaruno a panagbunga dagitoy ad-adunto manen ti maibungada. Kinuna pay ni Manang Felidel a kada dua a tawen, sukatanna dagiti mulana a papaya ta bumassitton ti maibunga dagitoy isu a kasapulan a mapabaro. Makadkadanon iti  siudad ti Batac, Ilocos Norte ken siudad ti San Fernando, La Union dagiti bunga ti papayana ta umay ang-angkaten dagitay aglaklako iti empanada.

Malaksid kadagiti nadakamat a panguartaan ni Manang Felidel, agmulmula pay iti hybrid a pagay ken mais iti nasurok gudua’t ektaria a paset ti farmna.

“Saankayo siguro a mamati ngem nakagatangak iti kotsek a brand new iti maminsan laeng a panagapitko iti talon ken maminsan a gulpe a panaglakok kadagiti baboyko a fattening,” siiisem nga inestoria ni Manang Felidel.

Naaddaan idin iti gundaway nga agnaed sadiay Hawaii kas migrante ngem idi ibagada nga agtrabaho kas teller iti bangko imbes nga iti maysa a farm wenno nursery a pangipakatanna koma iti ammona iti panagtalon, inkeddengna laengen ti agsubli iti Kailokuan tapno agtalon. Daytoy ngamin a talaga ti kayatna nga ubraen isu a sinublianna ti talon imbes nga agnaed iti paraiso a nagdappatan itan ti adu a Filipino, kangrunaanna dagiti Ilokano.

Kas nadakamat, graduado iti BS Agricultural Engineering ni Manang Felidel sadiay Tarlac College of Agriculture idi 1984. Nagtrabaho iti Cotton Research Development Institute, Philippine Tobacco Administration, Northern Food Corporation, National Tobacco Administration sa iti Ilocos Sur Tomato Paste Plant sakbay a tinutokanna a sukayen ti bukodna a daga. Innala met ti gobierno probinsial ti Ilocos Sur kas consultant iti Barang-ay Demofarm iti ili ti San Juan. Isu ti mangisursuro iti rumbeng a maaramid tapno agtultuloy a nalangto dagiti mula iti Pinakbet Farm uray pay iti kalgaw tapno agtultuloy a maap-apitan iti sibubukel a tawen.

Impakita ni Manang Felidel a saan a lapped ti kinababai tapno agtalon. Saan met a rumbeng a tagibassiten ti panagtalon ta napintas  daytoy a panguartaan no la ketdi maipakat a nasayaat dagiti teknolohia iti panagtalon.

Padasenyo man ngarud nga aramiden dagiti ar-aramiden ni Manang Felidel iti farmna ket sigurado nga umadu met ti maganaryo a kas kenkuana.#

Comments are closed.