Footer

SARITA: Antokoy, Kandidato para Mayor (Maudi a paset)

Sinaggaysa a minatmatan ni Pakol dagiti reporter sana kinuna: “No kayatyo a paneknekan, mabalinkayo a kuyogen iti puesto a nagpaaramidanna. Isu ti kasikatan nga agaramid iti peke a dokumento sadiay. No kayatmo, Apo reporter, payaramidanka pay iti diploma a nagturposka iti cosmetology sadiay Harvard University he! he!”

“Makitayo? Naggapun a mismo iti sigud a katalekda dagiti impormasion. Idawdawatko ngarud kadagiti kailianmi a dikay paallilaw. Awatenyo latta ti itedda a kuarta ta isu pay. Ngem ketdi pilienyo ti pudpudno a makaited iti panagbalbaliw. No ipaayyo ti talekyo itoy nanumo a kabsatyo, aramidekto dagiti inkarik kadakayo a panagbalbaliw ti ay-ayatentayo a Calungonan,” ginibusanen ni Antokoy ti interbio.

Saan metten a nagbayag dagiti tusong twosome a mediamen. Nagpakadada a dagus apaman a nayawat tay “pagsayaatan” tapno mapandan iyedit ti interbio. Impaibalon metten ni Antokoy kadakuada tay teddada a maritangtang ta imbagto la nga ebidensiada kadagiti assawada nga immayda talaga naginterbio.

Naginnapir da Batongol ken Pakol apaman a naitangepda ti ridaw. Naisem met ni Antokoy a nanglabas kadagitoy dua a disipulosna ta ammona nga apaman a sumingising ti init iti sumuno nga agsapa, pagsasaritaandanton ti imbutaktak ni Pakol.

Aldaw ti panagpipili. Nagtarus ni Antokoy iti Sleep Forever Funeral Homes kalpasan ti panaggapuna iti pagbubutosan. Kayatna ti aginana. Napaksuyanen iti makabulan a panagkampaniana. Maysa pay, nataltalged no ditoy ti pangurayanna iti resulta ti eleksion.  Amangan no agbabara dagiti agama a kabalubalna ket makapanunotda iti dakes kenkuana. Bay-annan da Batongol ken Pakol nga agrikurida kadagiti barangay uray ta automated metten ti eleksion. Saan itan a masuitik ti resulta malaksid no napasuksokan ti manggamulo iti PCOS machine.

Itan a mapanunotna ti maysa nga importante a banag. Asinon ti mangmanehar iti punerariana no mangabak a mayor? Kayatto ngata ni Baket Jovita nga inana no isunton ti tumao ditoy? Napateg kenkuana ti puneraria ta daytoy ti pagbibiaganna. Ala, ti nasken ita ket ti panangabakna. Kasaritananto ti inana tapno isunton ti makaammo iti puneraria nupay masansanto latta a sarungkaranna daytoy no nawaya.

Insadagna ti ulona iti swivel chairna. No mano nga oras a nailibay saanna nga ammo. Nalukag laeng iti  tokar nga aggapu iti maysa kadagiti trumpa ti karro iti ruar. Simmirip. Nasipnget gayamen. Nakagangaten dagiti silaw. Nagdardaras a rimmuar ni Antokoy tapno kitaenna no asino ti agpatpatokar. Nakitana a nakangangan a matmaturog ni Batongol idinto a nagpigsan ti urok ni Pakol iti uneg ti karro a paggapgapuan ti tokar.

“Ania ti ubrayo ditoy a dua?” pinampag ni Antokoy ti ridaw ti karro a dagus a nagbaringkuasan dagiti dua.”Apay nga addakayo ditoy? Di met kunak nga agrikuskayo kadagiti barangay?” imbanniekesna.  “Sorry, boss, didaka metten natawagan itay. Mayat met ti turogmo a nadanonmi isu nga inyiladmi metten a!” insungbat ni Batongol.

“Denggem ti musicmi, boss,” kinuna met ni Pakol a nangipapigsa iti volume iti car stereo ket naipatayab ti:

“We are the champions, my friend

And we’ll keep on fighting till the end

We are the champions

We are the champions

No time for losers

Co’z we are the champions

Of the world!

Napalagto ni Antokoy. Kayatna ti agriaw.  Ta ania koma ti ipasimudaag ti ipatpatokar dagiti kakaduana no di ti panangabakna? No naabak koma, amangan no tay puniebre ti maipatpatayab ita iti ere.

Iti di unay adayo, adda dagiti anabaab a mangngegna. Idi tumaliaw ni Antokoy, nakitana dagiti agar-aramid iti lungon nga agturong iti puneraria,  idirdir-ida ti “Agbiag ni Mayor Balsamador! Agbiag ni Mayor Balsamador!”.

Nangigis ti isem ni Antokoy a nangsimpa iti kuelio ti badona. Kinermanna da Pakol ken Batongol ket nakalaglag-an ti riknana a rimmuar iti puneraria tapno sabatenna dagiti kalugaranna.#