Footer

BANNER NEWS: Subsistence allowance dagiti balud manamnama a maipangato

VIGAN CITY – Kinuna ti provincial warden a mangnamnama a maited ti nayon a food allowance dagiti balud ditoy probinsia iti itatapog ti Hunio daytoy a tawen.

Kinuna ni Provincial Jail Warden Floro Martinez nga impasingked kenkuana da Governor elect Luis “Chavit” Singson ken Vice Governor elect DeograciasVictor Savellano a maingato ti food allowance dagiti balud iti provincial jail ket namnamaenna a maited daytoy iti masungad a bulan.

Idi pay la napan a tawen a kiniddaw ni Martinez ti pannakaingato ti subsistence allowance dagiti balud iti P70 kada aldaw gapu ta marigatanda a mangiyan-anay iti  P30 a food allowance dagitoy.

Iti sessionda idi Enero 5 daytoy a tawen, nagtignay ti sangguniang panlalawigan a tumulong kadagiti balud babaen ti panangaprobarna iti maysa a resolusion a mangingato iti inaldaw a subsistence allowance dagiti balud  kalpasan ti pannakatakuat ti bise gobernador ti kinababa ti mait-ited nga alawans ti taraon dagitoy no maikumpara iti aw-awaten dagiti padada a balud kadagiti sabali a probinsia.

Indagadag idi ni Vice Governor Jerry Sngson ti pannakaingato ti subsistence allowance dagiti balud kalpasan ti pannakatakuatna ti kinababana idi nagpasiar ti grupo ti Knights of Rizal iti provincial jail tapno mamaskuada.

Kinuna ni Singson a “nakaay-ay-ay” ta P30 laeng ti subsistence allowance dagiti balud iti provincial jail idinto a P70 iti Ilocos Norte, La Union ken Pangasinan.

Inlungalong ni Singson ti pannakaaramid ti resolusion a mangingato iti subsistence allowance dagiti balud for “humanitarian reasons” gapu iti kinababana iti baet a kaunaan a nagbalin a first class a probinsia ti Ilocos Sur.

Napagbalin ti subsistence allowance dagiti balud iti P60 manipud iti P30 kada aldaw.

Iti maysa nga interbiona, kinuna ni Singson a maysa a lugar ti pagbaludan a “pagpampanunotan”  para iti naan-anay a panagbabawida ken panangtuntonda iti bileg ti pammati iti Dios ket “rumbeng laeng nga ikkantayo ida iti namnama bareng inton rummuardan ket nagbalbaliwda metten.”

Kinuna ni Martinez a mangnamnama a maipaay ti increase iti food allowance dagiti balud sakbay ti panagretirona iti serbisio.

Adda kadagupan a 157 a balud iti provincial jail.#