Footer

EDITORIAL: Kalpasan ti eleksion, matungpal kadi dagiti kari?

Nalpasen ti eleksion. Naammuantayon dagiti nangabak kadagiti nadumaduma a pagpuestuan.

Kas iti aniaman nga ay-ayam wenno pasalip, adda dagiti mangabak, adda met dagiti maabak.

Kadagiti nangabak, iyawatmi ti nabara a kablaaw. Kadagiti met naabak, makunami: diyo pay panawen nga agserbi kadagiti umili. Better luck next time.

Ala, nagtimeken dagiti umili. Binutosanda dagiti namnamaenda a makabael  a mangimaton iti rienda ti turay iti sumaruno a tallo a tawen iti biang dagiti lokal a turayen ken innem a tawen iti biang ti presidente ken bise presidente ti pagilian.

Idi kangitingitan ti panagkampania, arig ikari dagiti kandidato ti langit ken bulan tapno laeng maallukoyda dagiti umili a mangibutos kadakuada.

Ita ta nalpasen ti eleksion, mangnamnamakami a tungpalen dagiti kandidato dagiti inkarida. Mangnamnamakami a dida lipaten ken ipalpalikud laeng dagiti karida ket agtrabahoda a nadayaw, nadalus ken natakneng.

Raemen koma dagiti nabutosan dagiti imbalikasda idi panagkakampania a kas iti panangrespetoda ken panangsalimetmetda iti bukodda a dayaw ken reputasion.

Babaen dagiti butos, inyawat dagiti umili ti nadagsen a pagrebbengan kadagiti kappili a turayen. Kaapiring dayta pagrebbengan ti panagtalek dagiti umili nga aramiden dagitoy dadaulo ti kabaelanda para iti panagdur-as dagiti kailianda ken ti pagilian. Kasta met a karaipna ti namnama dagiti umili nga agtrabaho dagiti pinilida a nasudi ken sidadalus para iti pagimbagan ti kaaduan.

Ala, nalpasen ti basingkawel ti politika. Ikupintayon dagiti rimsua a saan a panagkikinnaawatan. Rugian koman dagiti nangabak nga itanggaya ti dakulapda kadagiti kinasupangetda iti politika para iti rekonsiliasion tapno mapunas dagiti di panagkikinnaawatan bayat ti kampania. Ipamaysada koman a sanguen dagiti nagkaadu a parikut a mangpadpadagsen iti ilida, ti probinsia ken iti pagilian.

Ngem saan koma nga agpannuray lattan dagiti umili kadagiti agtuturay iti pannakarisut dagiti kangrunaan a problema a sangsanguentayo ita kas iti nangina a magatgatang, kaadu dagiti awanan pagsapulan, bassit a sueldo, panagkunniber iti turay ken kadagiti ahensia ti turay ken dadduma pay a pakaseknantayo. Kasapulan met ti pannakitakunaynay dagiti umili tapno marisut dagitoy parikut.

Ngarud, saan koma nga agbuybuya lattan dagiti umili iti ruar. Makipasettayo. Agtimektayo. Ditayo koma agtalinaed lattan a naulimek ken bulsek kadagiti madi a maar-aramid iti turay. Ipariknatayo dagiti adda iti panunottayo. Isurattayo dagiti paliiwtayo.

No napigsa ti timektayo, masinunuo a dumngeg dagiti nabutosan a lidertayo ket agtrabahoda a kas pudpudno a dadaulo a mangibayog iti pagimbagan ti kaaduan, nangruna dagiti marigrigat nga umili ditoy pagilian.#