Footer

ITI INDAYON NI LAGIP: Ti ayat ti maysa nga ubing Salaysay: Danny Antalan

Kablaawanka man iti naimbag nga aldawmo, Manong Danny. Maysaak kadagiti naruay nga agbasbasa iti kolummo nga “Iti Indayon ni Lagip”.

Awagannak laengen iti Rosa, agtawen iti 36. Addaanak iti tallo nga annak: ni Angelo, agtawen iti 11; ni Gerlyn, agtawen iti 9 ken ni Jona, agtawen iti 8.

Baloakon, Manong Danny. Liman a tawen a natay daydi Peter a lakayko. Dakkel a kawak iti pannakatay ni Peter. Napukawmi nga agiina ti kangrunaan nga adigi ti pagtaenganmi.

Negosiante daydi Peter. Agangkat kadagiti natnateng  sana ipan ibuntog iti tiendaan a gatangen met dagiti aglaklako iti tiendaan.

Nasingpet nga asawa. Nananamko iti dennana ti kinadungngo ti maysa nga asawa. Saankami a makurkurangan a sangapamilia. Ngem anian, ta iti naminsan a panagibiahena iti natnateng, dinungpar ti bus ti dyip a manmanehuenna. Bangkayen ni lakay idi madatnganmi iti ospital.

Dakkel a kawak ti ipapatay ni Peter. Kellaat, naipabaklay iti abagak ti pannakailangoy dagiti tallo nga annakmi. Adda met ketdi naiduldulinmi a sangkabassit nga agpaay koma iti panagbasa dagiti annakmi ngem iti panaglabas ti tiempo, nain-inut a naibbus.

Nagturposak iti computer science ngem dinak pinalubosan idi ni Peter a sumrek iti trabaho.

“Aggiankan ditoy balay. Dagita ubbing ti asikasuem,” nakunana idi.

Dayta ti gapuna a nagbalinak nga agtagtagibalay lattan. Ngem iti ipapatay ni Peter ken iti in-inut a pannakaibbus ti iduldulinko a kuarta, napanunotko ti sumrek iti trabaho. Masapul nga agkutiak itan tapno mabiagko dagiti annakko. Awan metten dagiti dadakkelmi ken ni Peter a mabalin koma a pagtarayak.

Nakastrekak iti ilimi a kas clerk. Gapu ta pangadaywen ti barangaymi, nagkaserakami nga agiina iti kabesera. Ditoy metten nga inserrekko iti pagadalan publiko dagiti annakko nga agbasa.

Manong Danny, naawatkon ti ipupusing ni Peter iti dennami nga agiina. Ngem adda dagiti rabii a malukagak gapu iti tagainepko a lalailuennak ni Peter. Makariingak no kasdiay a kasla marikriknak pay ti pudot dagiti agek ni Peter. Pamrayak laengen ti agsangit a siulimek tapno saan a mangeg dagiti annakko ti marikriknak.

Saan a panangibuat iti bukodko a bangko, adda met pamuyaak, Manong Danny. Uray tallon ti annakko, tinartaripatok ti bagik. Adu ti mangibagbaga a kasla balasangak pay laeng. Uray dagiti kaopisinaak a lallaki, adda dagiti mangipaspasayag iti panagraemda kaniak. Ngem saanko nga intaltalek dagiti paripiripda. Iti ipupusay ni Peter, narikpan metten ti pusok.

Ngem kellaat a nagbaliw ti annayas ti panagbiagko idi maam-ammok ni Arthur. Kunak no inkuyogen ni Peter ti tanemna ti ayatko, nariknak ti pannakapekka dayta a pammatik.

Wen, Manong Danny, akuek nga iti panagam-ammomi ken ni Peter, nariing ti ayat iti barukongko a diak ninamnama nga agbukar pay maminsan kas iti sabong a naarbisan kalpasan ti nabayag a kalgaw!

(Maituloyto)