Footer

Market inspectors, nabilin istriktaranda maiserrek shellfish iti tiendaan publiko

SAN FERNANDO CITY – Imbilin ti regional director ti Bureau of Fish and Aquatic Resources ditoy kadagiti amin a market inspectors nga istriktaranda dagiti maiserrek a shellfish kadagiti tiendaan publiko amangan no kontaminado dagitoy iti red tide.

Imbilin daytoy ni Regional Director ti BFAR Nestor Domenden kalpasan ti pannakaduktal ti BFAR iti kaadda dagiti shellfish a maal-ala iti kabaybayan ti dua nga ili iti Pangasinan a kontaminado iti red tide toxin.

Sakbayna, nangipaulog ti BFAR iti maysa a ballaag a saan a panagsida dagiti umili kadagiti shellfish a pakaibilangan ti pasayan, padaw, aramang, arimbukeng, rasa, kappo, tirem, tahong, ken dadduma pay a clams a maala iti Anda ken Bolinao, Pangasinan agsipud ta naduktalan a positiboda iti red tide.

Kinuna ni Domenden a masapul nga agistrikto dagiti market inspectors wenno superbisor kadagiti tiendaan publiko iti rehion tapno saan a maiserrek dagiti shellfish a kontaminado iti red tide.

Kinuna ni Domenden a masapul a sukimaten dagiti inspektor wenno superbisor dagiti tiendaan publiko no adda maipakita dagiti negosiante nga auxillary invoice wenno commodity clearance dagiti iserrekda a shellfish tapno maammuan no nagtaudan dagitoy.

Maysa a phenomenum ti red tide ket nabirngasan a kastoy gapu iti panagmaris ti baybay a nalabaga gapu iti panagadu dagiti algae ket agbalin a toxic dagiti  apektaranda a sidaen a makalapan iti baybay a maka-igapu iti pannakasabidong dagiti agsida kadagitoy.

Makarikna ti tao a nagsida iti apektado iti red tide a shellfish iti panagbibineg ti bibig ken rupana, marigatan nga umanges ken agsao, ken panagbakuar ken posible a pakatayanna, aglalo no nangato unay ti level ti toxin ti naapektaran a shellfish nga impaunegna.#