Footer

Practical Nursing, maidiaya iti ISCC

Kas maysa a gannuat ti administrasion ni Gov. Deogracias Victor “DV” Savellano tapno dakdakkel ti tsansa dagiti kaprobinsiaan nga agtrabaho iti ballasiw-taaw, nakikammayet ti Ilocos Sur Community College Center for International Education and Employment Programs iti Kennedy Global School of Business Inc. tapno maipasdek ti School of Practical Nursing-Ilocos Sur Campus.

Itanggaya ti nasao a pagadalan ti one-year ken two- year practical nursing babaen ti U.S.A. adapted curriculum iti nababa ken kabaelan a matrikula.

Segun ken ni Savellano madaman ti enrolment iti ISCC. Mangrugi ti klase ditoy a pagadalan inton Hulio 1.

Adda dua a wagas ti panagadal iti nasao a pagadalan: umuna ti on campus wenno mapan panagklase iti uneg ti pagadalan idinto a mabalin met ti off campus wenno panagadal uray saan a sumrek iti eskuela babaen ti School Away Program (SAP) para kadagiti estudiante nga agnaed iti nasusulinek a luglugar.   Mabalin pay nga i-avail dagiti migrante nga agnaed iti Estados Unidos ti SAP babaen ti Kennedy International School System (KISS) iti California ken Hawaii.

“Ti pagsayaatan daytoy a programatayo ket mabalin a maaramat ti nagturpos ti maadalna ditoy iti panagtrabahona iti USA, Australia ken Canada,” kinuna ti gobernador.

Para iti ad-adu pay nga impormasion mainaig iti baro a programa, pumasiar iti Quirino Stadium iti Bantay, Ilocos Sur wenno umawag iti (077) 722 2843 /(077) 2740/ 09273751758/ 091756683379 ken 09284082505.#

Comments are closed.