Footer

Sikio, balo, sabali pay, nagudas iti nagsisina a pammapatay

CANDON City – Maysa a bangkay ti lalaki ti nasarakan iti Barangay Calungboyan ditoy siudad.

Nabigbig ti biktima a ni Alejandrino Astrero, 57, residente iti nadakamat a lugar,. Nagsagrap ni Astrero kadagiti sugat a gapuanan iti paltog.

Iti inisial nga inbestigasion dagiti polis, nasarakan ni Artemio Valdez, agtartartaraken iti baka ti biktima,  iti agarup alas 7 ti bigat ni Astrero a nadigos iti dara iti asideg ti balayna.

Segun met iti maysa a kaarruba ti biktima, sakbay ti pammaltog, nakitana ti dua a lalaki a nakamangisit a nangiparking iti motorda iti asideg ti balay ti biktima.

Mapapati a 9 mm ti paltog a naaramat iti pammapatay.

Di pay ammo no ania ti motibo ti krimen.

Kabayatanna, maysa a balo ti tinambang dagiti armado a tattao iti nagkurusan ti provincial road a sakup ti Poblacion Sur, Sta. Maria, Ilocos Sur iti ala una beinte ti parbangon ti Mayo 17.

Dagus a natay ni Brigido Lazaro, Jr., 45, residente iti Barangay Callitong, Burgos, Ilocos Sur gapu iti sugatna iti ulo, barukong ken kannigid nga abagana.

Kalibre 45 ti mapapati a naaramat iti pammapatay kas maibatay kadagiti nasarakan a kapsula iti nakapasamakan ti krimen.

Di pay ammo ti kinasiasino dagiti nangtambang ken ni Lazaro ken no ania ti motiboda a nanggudas iti biktima.

Iti sabali a damag, napapatay itay nabiit ti maysa a security guard iti uneg ti pagtaenganna iti Barangay Dardarat, Cabugao, Ilocos Sur.

Natayen ni Wilfredo Garcia, 48, naasawaan, residente iti nadakamat a barangay, idi maidanon iti Pira Clinic and Hospital.

Segun iti report, nakariing ni Garcia  iti agarup alas dies ti rabii idi adda agtugtog iti tawa ti balayda. Idi mapan kitaen ti biktima ida, pinaltoganen dagiti di nabigbig.

Nakasarak dagiti inbestigador iti crime scene iti pito a kapsula manipud iti karbin ken 2 a kapsula manipud ti kal. 45.

Madama ti inbestigasion no asino dagiti pimmatay iti biktima.#

Comments are closed.