Footer

Singson-Goulart, impasingkedna transparency iti administrasionna

CAOAYAN, Ilocos Sur – Impasingked ti mayor-elect ditoy nga ili nga aniaman dagiti pondo a madanonna iti panagtugawna, maipakaammo kadagiti tattao tapno ammoda ti pangrugianan ti administrasionna.

“…Adda met ti makunkuna a transition team ti amin nga LGUs a ti chairmanna ket ti outgoing mayor ken nadumaduma a parte ti LGU, ket anianto nga ipresentarda, mabalintayo a binsabinsaen ta kitaentayo no ania ti agdama a coffer wenno baknang ti ili a Caoayan,” kinuna ni Mayor elect Germy Singson-Goulart idinto nga inyunay-unayna a transparency ti kayatna a masurot iti panagtugawna a mayor.

Iti kalkalpas nga eleksion, inabak ni Goulart ni Atty. Tito Tugade para iti kinamayor babaen ti nasurok a 1,800 a butos. Inatiw met ni incumbent Vice Mayor Gemma Padaong a katiket ni Goulart ni Mayor Mario Tugade a nagalus-os iti kinabise mayor iti daytoy a panagpipili babaen ti 114 a butos.

Kinuna ni Goulart bayat ti pannakiuman kenkuana ti Bombo Radyo idi Mayo 18 a kayatna a maipakaammo kadagiti umili aniaman a madanonna a pondo tapno ammoda no ania ti pangrugiananda a kabarbaro nga agtugaw ken tapno ammoda dagiti maisayangkat a programa a pakaipaayan dagiti nabatbati a pondo ti ili.

Mainaig dagiti casual, kinuna ni Goulart a kitaenna no ania ti talaga a kasapulan ti  ili, local government unit agsipud ta narigat met nga iyemplo amin  dagiti casual wenno contractual a saanda met a talaga a kasapulan.

Agpatingga ti kontrata dagiti casual wenno contractual iti Hunio 30.

Kinuna ni Goulart a 4th class municipality laeng ti Caoayan ket ti work force a  makaited iti serbisio laeng ti kasapulan ti ili.

“Binsabinsaentayo ta saan met a mabalin nga iyemplo amin a casual a saanda met a kasapulan,” kinuna ni Goulart sana innayon a “…no rebbengna a mangnayontayo iti casual iti maysa a departamento,  okay mangnayontayo. Ngem no rebbengna a saan a kasdiay kaadu ti casual iti maysa a departamento, kasapulan nga agkissaytayo, tapno maka-savetayo iti pondo ti gobierno.”#

Comments are closed.