Footer

Tissue culture ti saba, marunggay, katuday, maigannuat

SAN JUAN, Ilocos Sur – Impalgak ti BaRangay demo farm project coordinator ditoy a babaen ti tissue culture, makapatanorda iti demo farm iti milion a seedlings a saba, marunggay ken katuday.

Kinuna ni BaRangay demo farm project coordinator Dr. Cesar Soller a plano ti gobierno probinsial nga iwaras dagiti mapatanor a seedlings ti saba, marunggay ken katuday iti sapasap a barangay iti probinsia tapno masulnitan ti pagkurangan a taraon ken malapdan ti malnutrision iti probinsia.

Kanaig daytoy, uppat nga agriculture technologists ti mapan agsanay iti tissue culture iti University of the Philippines, Los Baños, Laguna.

Kinuna ni  Soller a ti panagsanay dagiti nasao a technologists ket paset ti SAMAKA program ti gobierno probinsial a panangpaberde iti probinsia babaen ti panangpaadu iti maimula a saba, marunggay ken katuday.

Iti maysa nga interbiona iti media, kinuna ti Gov. Deogracias Victor Savellano a nupay adun dagiti mula a marunggay ken katuday kadagiti barangay, maysa a parte daytoy a programa ti saba, isu a naawagan iti SAMAKA.

Kinuna pay ti gobernador nga adu dagiti nadumaduma a variety ti saba ditoy probinsia ket dagitoyen ti mapaadu babaen ti tissue culture a mapan adalen dagiti agriculture technologists iti Los Baños.

Kabayatanna, madama a maipaspasdek ti farmers’ training center iti BaRangay demo farm ditoy, segun iti gobernador.

Kinunana a no agpaut ti panag-training dagiti mannalon ket umabot iti dua wenno tallo nga aldaw, addanto payen paggiananda iti uneg ti demo farm.

Innayon ti gobernador nga agkikinnammayet iti daytoy a gannuat ti MMMSU, PhilRice, ti gobierno probinsial ken ti training staff ti demo farm.

Naammuan pay nga addan naipasdek nga animal clinic iti uneg ti BaRangay farm a silulukat iti 24 nga oras a madadaan a mangtaming kadagiti masakit nga animal.#

Comments are closed.