Footer

Addan pamalpalatpatan polis iti nanggudas Singaporean national

VIGAN CITY – Addan lead dagiti polis iti kinasiasino ti nanggudas iti Singaporean national iti maysa a hardware store ditoy siudad iti bigat ti Mayo 23.

Kinuna ti polis ditoy nga addan iti ikutda ti kopia ti recording ti CCTV camera a naimuntar iti New Born Lumber and Hardware a mangitudo iti lalaki a nangpaltog ken ni Cyril Gomez, 67, naasawaan, Singaporean national a retirado a major iti Army, agnaed iti Barangay San Julian Sur ditoy siudad.

Kas maibatay iti recording, nakatugaw ti biktima iti sanguanan ti lamisaan ti cashier ti pagtagilakuan idi inasitgan ti maysa a nakakallugong, nakadiaket, nakasiortpan, ken nakatisiert iti gray a lalaki, sana pinaputokan ti biktima.

Naglibas ti suspek babaen ti panagluganna iti nangisit nga XRM a motorsiklo a minaneho ti sabali a lalaki a mapapati a nagbalin a lookout iti pannakaisayangkat ti krimen.

Naitaray ni Gomez iti Metro Vigan Cooperative Hospital ngem saanen a naidanon a sibibiag.

Kitkitaen ti polis ti anggulo a maysa a hired killer ti nangpatay ken ni Gomez.

Sakbayna, iti interbio ni Peter Rebunal ken ni Marilou Gomez, asawa ti biktima a naipatangatang iti DWRS, nadakamatna nga adu dagiti napautangan ti Singaporean national a dina masingsingir a puon ti nangidarumanna kadagitoy iti korte.

Segun iti asawa ti biktima, adda uppat nga indarumda iti korte gapu ta dida agbayad iti utangda.

“Pattapattak a dagiti napautanganna ta dayta met laeng ti problema ni lakayko,” insungbat ni Marilou idi saludsoden ni Jun Ramos, anchorman ti Barangay Commando Brigada no adda suspetsana mainaig iti pannakapapatay ti asawana.

Nupay kasta, saan nga impalgak ti asawa ti biktima ti nagan dagiti indarum ti asawana gapu iti mapapati a dida panagbayad iti utangda.

Segun ken ni Marilou, umabot iti sangapulo ket lima dagiti napautangan ni lakayna ket P300,000 ti kadakkelan a pautangna.

Nadakamat pay ti baket nga adda nakasubang ni lakayna a babai a napan iti balayda nakisarita a saan pay a makabayad.

Iti kallabes, naireklamo iti radio ti biktima gapu iti agalingasaw a bangsit ti piggeryna iti barangayda.

Ngem kinuna ni Marilou nga awanen ti baboyda ken awan metten ti reklamo maikontra kadakuada.

Kinuna ti polis a makatulong  ti recording ti CCTV iti panagimbestigada ket namnamaenda nga adda pagdur-asan ti kaso iti mabiit.#

Comments are closed.