Footer

BANNER NEWS: Double murder naikaso kontra suspek iti pannakapapatay dua a bakla

BANTAY, Ilocos Sur – Ibilang ti kapolisan ditoy a nasolbaren ti pannakapapatay ti dua a bakla iti rabii ti Mayo 24 kalpasan a naipila ti kaso a double murder maikontra iti kangrunaan a suspek iti provincial prosecutor’s office.

Simmuko ti suspek a menor de edad, 17, iti polis ti San Quentin, Abra  itay Mayo 26 sa naiyawat iti dayta met laeng nga aldaw kadagiti pannakabagi ti linteg nga indauluan PCI Honesto Lazo, hepe ti polis ti Bantay, a napan nangsukon kenkuana.

Kiniddaw dagiti nagannak ti suspek nga agtalinaed ti suspek iti kustodia ti polis ditoy agsipud iti amakda nga adda dakes a mapasamakna no temporario a maruk-atan.

Sakbayna, intudo dagiti kabarkada ti suspek nga isu ti nangpatay kada Gener del Castillo Bautista, 40, residente iti Bulag West ken ni Jeffrey Pacleb, 23, residente iti Barangay Taguiporo idi rabii ti Mayo 24.

Saan nga innagananti polis  ti suspek ken dagiti saksi gapu ta agpapadada a menor de edad.

Nasarakan  iti agsapa ti Mayo 25 ti bangkay da  Bautista ken Pacleb iti kamaisan iti sakup ti Barangay East a nagsagrap kadagiti bagsol a mapapati a puon ti nakatayanda.

Nasarakan ti bangkay ni Bautista iti mapattapatta a nasurok a 100 metro ti kaadayona iti bangkay ni Pacleb. Nagsagrap iti nasurok a sangapulo a bagsol tunggal maysa.

Ti panagsina ti suspek ken ti nobiana gapu iti mapapati a panangpadpadakes kenkuana ti maysa kadagiti biktima ti maitudtudo a motibo ti pammapatay.

Kinuna ni police investigator Joel Javier nga intudo dagiti kabarkada ti suspek nga isu ti nangibaltog iti bato ken nangbagbagsol kada Bautista ken Pacleb.

Segun iti inbestigador, impudno dagiti saksi a nagkukuyogda iti suspek ken dagiti biktima iti dayta a rabii a pannakapasamak ti krimen.

Segun ken ni Barangay Captain Flor Pacleb, dinagas ni Bautista ti kaanakanna a ni Jeffrey ket rimmuarda iti pasado alas otso ti rabii ti Mayo 24.

Mapapati a masansan a rummuar iti rabii dagiti biktima.

Saan nga ammo ti kapitan no nagturongan dagiti dua. Naammuanna laengen a nabagbagsol dagiti dua a bakla idi nagreport kenkuana ti maysa a tanodna iti agsapa ti Mayo 25.

Kinuna ti kapitan a sakup pay laeng ti Barangay Bulag East ti nakapasamakan ti krimen nupay asidegen iti nagbednganda iti Barangay Taguiporo

Kinuna ni Javier a maibatay iti salaysay dagiti saksi, nagturongda iti Barangay Naguiddayan tapno dagasenda ti maysa a gayyem dagiti bakla ngem awan daytoy.

Segun iti maysa a saksi, bayat ti panagsublida, naud-udi ti suspek ken ni Bautista kadagiti kakaduada.

Segun pay iti saksi, nakitana laengen nga adda iggem ti suspek a bato ket imbaltogna iti likud ti  ulo ni Bautista. Idi madalupo ti biktima, mapapati a sinakayan ti suspek sana binagbagsol.

Mapapati nga aglibas koman ti suspek ngem nasabatna ni Pacleb a mangsubli koma iti padana a bakla ket insarunona a binagbagsol daytoy.

Iti salaysay dagiti saksi, nagsasarakda nga agkakabarkada iti asideg ti waig ket mapapati nga inannugot ti suspek a pinatayna dagiti biktima. Kuna dagiti saksi a nagbuggo pay ti suspek iti waig ken impalladawna ti kutsilio iti dalanda.

Iti pannakaisurat daytoy, saan pay a nabirokan dagiti polis ti kutsilio a naaramat iti pammapatay.#

Comments are closed.