Footer

Grupo ti transportasion, mapastrek iti Vigan City

VIGAN CITY – Kalpasan ti nabayag a deliberasion ken pannakaipaknina, inaprobaran ti sangguniang panlungsod ti ordinansa a mangipalubos iti panagparking ti maysa a transport group iti bus terminal ditoy siudad.

Inaprobaran ti konseho iti maikadua a pannakaibasana bayat ti sessionda itay Mayo 24 ti ordinansa a pinutar ni Konsehal George Villanueva a mangipalubos iti GT van nga agparking nga agkarga iti pasahero iti Vigan City Minibus and Jeep Terminal.

Kanaig daytoy, kinuna ni Villanueva a “dakkel ti kaipapananna” iti siudad ti Vigan ti pannakaipalubos dagiti van nga agparking iti terminal ti siudad, agsipud ta makapastrek ti city government iti nasurok a P400,000 iti makatawen iti pannakaaramat laeng ti terminal.

“No inayontayo pay dagiti sabali a bayadanda iti siudad kas iti mayor’s permit… makakolekta ti siudad iti aganay P500,000 iti tinawen,” kinuna ni Villanueva.

Kinuna ti konsehal a nabayagen nga umar-areng-eng dagiti operators dagiti van a maikkanda iti puesto iti terminal ket addan inted ti Land Transportation Franchise Regulatory Board a linia dagiti van ket no masurot a siinget ti paglintegan, “ministerial laeng koma ti akem ti siudad isu a nangaramidkami iti naan-anay a paglintegan ta “kayatmi met a mabenepisiaran ti siudad ti Vigan.”

Agbayad iti inaldaw a parking fee a P30 dagiti mapattapatta a 40 van nga agbiahe manipud iti Vigan City nga agpa-Sta. Maria ken Candon City ken vice versa.

Sakbayna, naglasat ti ordinansa iti nabara a diskusion gapu iti amak ti sumagmamano a konsehal nga ad-adda a rumikut ti trapiko no mapalubosan dagiti van a sumrek iti siudad ken iti mapapati a panagreklamo dagiti operator dagiti minibus ken dyipan gapu iti kompetision nga ipaay dagitoy.

Ngem kinuna ni Villanueva a “no sumrekka iti transport industry, nakasaganaka iti kompetision” sana innayon  nga idi sumsumrek dagiti van, dagiti koma operators ti bus ti kangrunaan a nangkontra iti aplikasionda.

Kinuna pay ni Villanueva nga inikkanda dagiti operators ti minibus iti gundaway a mangidatag iti position paperda mainaig iti panagparking dagiti van iti terminal ngem awan met ti naawatda.

Kinuna ni Villanueva a maysa laeng nga aprehension ti marikrikna dagiti operators dagiti minibus agsipud ta nanginngina met ti singir a plete dagiti van.

‘Maited iti opsion iti riding public. No kayatda ti aglugan iti bus, wenno iti van, mabalinda ti agpili. Definitely, mabenepisiaran ti riding public,” kinuna ni Villanueva.

Innayon ti konsehal a very minimal ti maited dagiti van iti trapiko agsipud ta saanda met nga aglikawlikaw iti uneg ti siudad  ta mapanda met laeng agdiskarga iti pasahero iti terminal.

Innayon ni Villanueva a makatulong pay dagiti van iti panagdur-as ti turismo  iti siudad agsipud ta kayat met dagiti turista ti kaadda dagiti nanam-ay a paglugananda no agpasiarda iti maysa a lugar.

Kinuna ti konsehal a dagiti maur-or a pondo manipud parking fee dagiti van, agsublinto met laeng kadagiti agindeg iti Vigan babaen ti nasaysayaat a serbisio nga ipaay ti gobierno ti siudad.#

Comments are closed.