Footer

ITI INDAYON NI LAGIP: Ti ayat ti maysa nga ubing (Tuloyna)

Naam-ammok ni Arthur iti maysa a pasken iti opisinami.

Diakto malipatan daydi a rabii, Manong Danny. Disiembre 18, 2009. Christmas partymi nga empleado iti city government. Naragsakkami amin ta naigiddan iti party ti pannakaiyawat ti Christmas bonus ken 13th month paymi.

Agpatpatangkami ken ni Cely, hepe ti Human Resource Development Office, idi immasideg ti maysa a nataraki a lalaki,  ket inyam-ammona ti bagina kadakami.

“Siak ni Arthur De La Rosa, agtawen iti 21, tubo iti Cabugao, Ilocos Sur, agdama a website master ti maysa a lokal government unit… ken certified a baro pay,” kinunana.

Nagkatawa ni Cely ngem sabali ti nariknak. Diak ammo no apay a kasla malunagak iti perrengna.

“Awagannak lattan iti Cely. Ngem sayang ta addan sabali a nakauna kenka,” inrungiit ni Cely. “Daytoy kaduak ti mabalbalin pay… kaarigna ti sabong nga agam-ampayag pay ti banglona…”

Nasidolko la ket ngarud ni Cely.

“Awan san ti naggian iti basoyo. Yalaankayo iti mainom,” kinuna ni Arthur sa timmakder nga immadayo.

“Kursonadakan sa,” kinuna ni Cely idinto nga insungona ti likudan ni Arthur.

“Sus, pakpakawan, nagubingan. Amangan no kantiawandanto iti agbabaket.”

“Uy, no dagiti dadduma laeng a babbalasang, adayo ti pangatiwam kadakuada,” immulagat ni Cely.

Naputed ti panagpatpatangmi ta umas-asidegen ni Arthur a nakaiggem iti tray a naglaon iti dua a baso a napno iti orange juice ken sandwiches ken dua a botelia ti beer.

Iti dayta a rabii, saanen a simmina iti lamisaanmi ni Arthur. Saan a nagsardeng agingga iti saanna a naala ti numero ti selponko ken ti pagkaseraak. Diak koma ited ngem ni Cely ti nangibaga uray kasano ti panangmulagatko kenkuana.

“Apay nga inaramidmo daydiay?” nakunak idi awanen ni Arthur.

“Loka, ubingka pay. Saanmo a sayangen ti biagmo a dagiti laengen annakmo ti pakaiturongan ti aminmo. Kasapulan met nga adda katulongam a mangilangoy kadagiti annakmo.”

“Ngem por dios, nagdakkel ti baetmi a dua,” nakunak.

“No agkaayatankayo, awan ti baket, awan ti ubing,” agkatkatawa a kinuna ni Cely.
“Age does not matter, saan kadi? Agparparikna kaniak a dakkelto ti paset ni Arthur iti biagmo, ken dagiti annakmo.”

Saannak a simmungbat. Ngem diak ammo no apay a kasla naragsakannak iti dayta nga imbalikas ni Cely.

Iti dayta a Sabado, diak ninamnama a sumarungkar ni Arthur. Madama a tultulongak dagiti annakko iti leksionda iti eskuela idi adda naggapu. Naklaatak idi makitak ni Arthur. Adda iggemna a sabong ken tsokolate.

“Naiyaw-awankan sa,” nakunak idinto a pinastrekko iti bassit a salas. Nasiputak ti panagtitinnaliaw dagiti annakko.

“Dagitoy gayam da Angelo, Gerlyn, ken ni Jona,” nakuna ni Arthur sana kinablaawan ida.

Saan a nagtimek dagiti annakko. Nagtalinaedda a nakamulengleng iti sangaili. Idi kuan, sintimek a pimmanawda iti salas ket napanda iti kuartomi. Saandan a rimmuar iti siled agingga iti saan a nakapanaw ni Arthur.

Mariknak, saanda a kayat ni Arthur. Dida kayat nga adda sumukat iti daydi amada!

(Adda tuloyna)