Footer

Austrian a padi, padayawan ti konseho ti Vigan

VIGAN CITY – Padayawan ti Konseho ditoy siudad ti maysa a ganggannaet a padi kas pammigbig kadagiti adu a naitulongna kadagiti marigrigat nga agindeg ditoy siudad.

Inaprobaran ti sangguniang panlungsod ditoy iti naudi a sessionda ti maysa a resolusion a pinutar ni Konsehal Benjos Verzosa a mangipaay iti pammigbig ken ni Fr. Joseph Tassner, 91, maysa nga Austrian a padi, gapu iti adu a naitulongna a pinansial ken pannakaipasdek dagiti housing projects ditoy siudad a naited kadagiti marigrigat nga agindeg iti siudad nga awanan iti balay.

Kinuna ni Vice Mayor Franz Ranches a nangisuro idi ni Fr. Tassner iti Immaculate Conception School of Theology wenno Major Seminary ket nagbalin nga adbokasiana ti pannakaipaay iti pagtaengan dagiti marigrigat nga agindeg iti Vigan.

Innayon ti bise mayor a babaen iti impasdekna a foundation, nagur-or ni Fr. Tassner iti pondo manipud iti ballasiw-taaw nga imburayna a tulong kadagiti marigrigat a residente ditoy babaen kadagiti livelihood projects, kas iti panagtaraken iti dingnguen ken pannakaipasdek iti socialized housing projects para kadagiti nakurapay a taga-Vigan.

Segun met ken ni Konsehal Verzosa, babaen ti initiatibo ni Fr. Tassner, naipasdek dagiti housing projects iti St. Joseph Village iti Barangay IV;St. Mary’s Village, Phase 1 and 2 ken San Lorenzo Village, iti  Barangay Pantay Daya; St. Patrick Village iti  Barangay Tamag; sumagmamano a balay iti Barangay Paratong ken Barangay 9 a nakabenepisiaran ti nasurok a 150 a pamilia, malaksid laeng dagiti programana ti scholarship a nakabenepisiaran dagiti marigrigat ngem masirib nga ubbing ditoy siudad.

Kinuna ni Ranches a “long overdue” ti nasao a pammadayaw ngem “at least, addan dayta a recognition.”

Idi damo, natinong a maiyawat ti nasao a pammadayaw iti panangselebrar  ti Vigan City iti Konbersion ni San Pablo inton Enero 25, 2011 ngem insingasing ni Konsehal Audie Agdamag a maited ti pammadayaw iti kabiitan a panawen gapu iti kinalakayen ti padi.

Kinuna ni Ranches a rumbeng laeng nga awaten ni Fr. Tassner ti pammigbig  ita ta sibibiag pay.#