Footer

BANNER NEWS: Provincial director kadagiti COP: naing-inget a kampania kontra kriminalidad

BANTAY, Ilocos Sur – Imbilin ti provincial director PNP ditoy kadagiti amin a hepe ti polis ti panangiwayatda iti proactive  campaign maikontra iti kriminalidad iti sanguanan dagiti nagsasaruno a pammapatay a naisayangkat ditoy probinsia.

Impaulog ni PNP Provincial Director Police Senior Supt. Eduardo Dopale, Jr., daytoy a pammilinna gapu iti umad-adu a bilang dagiti biktima ti pammaltog iti probinsia.

Iti baet a nakapakat pay laeng ti gun ban gapu iti eleksion idi Mayo 10, nagsasaruno dagiti pammapatay iti probinsia a nakaaramatan ti paltog.

Kaudian nga insidente ti pannakapapatay idi Mayo 29  ni Cabigbigaan Barangay Captain Salvador Tabangay bayat ti panaggapuna iti galiera iti Barangay Bacunero, Sto. Domingo, Ilocos Sur.

Kalibre 45 ti naaramat iti pammapatay kas maibatay kadagiti kapsula a narekobre dagiti inbestigador iti crime scene.

Pinaltogan met ti di nabigbig a tao ni Mario Rivera iti agsapa ti Hunio 1 iti Zone 5, Bantay, Ilocos Sur bayat ti panagdaliasatna iti Quirino Boulevard a nakasakay iti motorsiklona.

Kalibre 45 ti naaramat iti pammaltog maibasar dagiti uppat a basio a nasarakan dagiti polis iti nakapasamakan ti krimen.

Di pay nabigbig ti pimmatay ken ni Rivera.

Sakbayna, pinarakapak ti dua a lalaki a naglugan iti motorsiklo ni Lorman Yadao, residente iti Barangay Teppeng, Sinait, Ilocos Sur bayat ti panagdaliasatna iti kalsada nasional a sakup ti Barangay Paratong, Sinait iti agarup 7:45 iti rabii ti Mayo 25.

Pinaltogan met ti maysa a mapapati a gun for hire ni Cyril Gomez, Singaporean national iti uneg ti maysa a lumber and hardware store  iti Vigan City idi bigat ti Mayo 23.

Mapapati a kalibre 45 ti inaramat ti di pay nabigbig a kriminal a nangpaltog ken ni Gomez.

Naammuan ti Tawid News nga iti bulan ti Abril ken Mayo, agdagup iti 23 dagiti pammapatay iti probinsia a nakaaramatan ti paltog idinto a 6 laeng ti nasolbar kadagitoy wenno iti 26.08% a crime solution efficiency.

Kabayatanna, binilin ni Dopale amin dagiti hepe ti polis iti probinsia ti panangiwayatda iti naan-anay nga inbestigasion para iti madagdagus a pannakasolbar dagiti kaso ti pammapatay iti hurisdiksionda.

Imbilin pay ni Dopale a maipakat ti proactive anti-criminality campaign kas iti naing-inget a pannakaiwayat ti police checkpoint nangruna kadagiti agkalubbon a nakamotorsiklo, no plate no travel policy, Operation Kapkap Bakal kadagiti amin a paginuman ken maximum police visibility nangruna kadagiti lugar a nakapasamakan kadagiti pammapatay.#

Comments are closed.