Footer

EDITORIAL: Kappia ken Rekonsiliasion

Ayonanmi la unay ti panggep ni Governor-elect Esmael “Toto” Mangudadato ti Maguindanao a panangbangon iti maysa a memorial para kadagiti biktima ti nakaam-ames unay massacre idi Nobiembre 23, 2009.

Rumbeng laeng a maipaayan dagitoy a biktima iti pakalaglagipan kadakuada iti mismo a nakapasaganda.  Saan nga agserbi ti ipatakder a pakalaglagipan a kas buelta-riri  kadagiti nadangkok la unay nga annabo ni Pilato no di ket agnanayon a panangipalagip nga awan ti mamaay dagiti makadurmen nga addang ken managimbubukod a panirigan iti naprogreso a gimong. Agserbi ti memorial a kas pangriing kadagiti amin nga agtakem iti turay a saan nga umabante dagiti managimbubukod a panggep a nalaokan iti aramid a maikaniwas iti tao.

Karaman kadagiti limapulo ket pito a biktima ti 30 a kameng ti media. Dayta ti nangibayog iti Pilipinas a kakritikalan a lugar iti lubong kadagiti amin a kameng ti Fourth Estate. Maipalagip a mapan agipila dagiti kakabsat ni Mangudadato iti candidacy daytoy idi napapatayda a kasla awan gawayda a piek. Masaker a saan laeng ti pagilian ti nadayyeg no di pay ti sangalubongan gapu iti kinaamesna.

Daytoy a pasamak ti nangilamina iti panunot, isip ken puso iti amin, nga iti ili ti Ampatuan, probinsia ti Maguindanao ti nakapasamakan ti nakaam-ames a krimen nga awan ngatan ti kapadana iti pakasaritaan ti pagilian mainaig iti eleksion.

Lugayanmi ti nadarisay a panggep ni Governor-elect Mangudadato iti pannakabuangay ti nasao a memorial park.

“It will also serve as testament to the newly-found freedom of the people of Maguindanao…” kinunana. Wen, ti tumaud a pakalaglagipan ket saanna laeng nga isimsimbolo ti pannakawayawaya ti lugar no di pay ti namnama nga umaddang ti marigrigat nga ili ket agbalin a narangya, narangpaya ken nadur-as nga ili a pagindegan dagiti nawaya nga umili. Daytoy ti kasapulan dagiti umili a nabayagen a saan a makagulagol iti bekkel dagiti addaan iti rapangan a panagem. Karbengan ti amin nga umili ti agbiag iti nadur-as ken nawaya nga ili ken addaan iti sibibiag a namnama.

Kanunonganmi pay ni former representative ti probinsia ti Sultan Kudarat  Pax Mangudadato idi kunana: “The key to development is peace and reconciliation. There can never be peace and harmony if we are divided. Our people have suffered a lot from never-ending atrocities and armed confrontation…” Wen, nasakit man a panunoten ti makadurmen a napasamak, ngem masapul ken nasken la unay a positibo dagiti gannuattayo nga agturong iti nadur-as ken nawaya a panagbiag. Saanto a mapasamak dayta no awan ti kappia ken rekonsiliasion.

Kinuna pay ti diputado: “Let’s punish the guilty because I believe not all the Ampatuans are involved in the massacre…”

Nasken la unay ti panagtutunos. Ngem awan ti panagtutunos no ikagumaan ti bales. Awan met ti naraniag a masakbayan ti binnales.  Agnanayonto a natuok ti panagbiag. Ta saan a makatulong ti binnales iti panagdur-as.

Umno la unay nga ayonantayo ken suportaran ti kappia ken rekonsiliasion tapno agmaris iti naraniag ti pakasaritaan ti lugar a pinangisit ti nakaam-ames a pannakamasaker dagiti inosente a tattao a pakairamanan dagiti kameng ti media.#

Comments are closed.