Footer

Gun for hire masuspetsa a nangpapatay iti Cabigbigaan barangay captain

SANTO DOMINGO, Ilocos Sur – Saan a politika no di ti napalabas a nakaisangkotanna a kaso ti maysa kadagiti anggulo a kitkitaen dagiti polis iti pannakapapatay ti maysa a barangay captain iti asideg ti pagpallotan iti Barangay Bacunero ditoy nga ili idi Mayo 29.

“Awan a pulos ti nairepreport kaniak a problema maipanggep iti politika iti Barangay Cabigbigaan iti napalabas,” kinuna ni Police Inspector Arsenio Ramos, hepe ti polis ditoy, iti interbio kenkuana ni Eugene Paet ti DWRS Commando Radio itay nabiit kas reaksionna iti agwarwaras a damag a politika ti adda iti likudan ti pannakapapatay ni Barangay Captain ti Cabigbigaan Salvador Tabangay.

Kinuna ti hepe ti polis a ti mapapati a pannakainbolbar ti biktima iti droga ken ti kasona nga estafa iti napalabas ti tuttutokan dagiti polis.

“Segun kadagiti reports…, adda met dagiti aramidna idi adda pay iti serbisio,” kinuna ni Ramos idinto nga innayonna a namin-adu a rineid ti polis ti balay ti biktima gapu iti mapapati a pannakainbolbarna iti droga idi saan pay nga isuna ti hepe ti polis ditoy nga ili.

“…adda pay nakitami ditoy nga estafa case maikontra ken ni Tabangay gapu iti saanna a panagbayad iti pinustaanna iti pallotan,” kinuna ni Ramos.

Kinuna ti hepe ti polis a nupay nabayagen dagitoy a kasona, “ditayo met ammo no ita la a natsansaanda” sana innayon a dagitoy ti pinagtitiponda iti panagimbestigada.

Kinuna ni Ramos nga adda dagiti pagilasinan a hired killer ti nangpatay iti barangay captain.

Segun ken ni Ramos, iti inisial nga inbestigasionda, karuruar ni Tabangay iti galiera idi pinalikudan a pinaltogan ti suspek.

Idi natumba ni Tabangay, mapapati nga inasitgan ti suspek sana pinaputokan manen.

Kinuna ni Ramos a ti sugat ti biktima iti puon ti lapayagna  ti nakatayanna.

Mapapati a nagnagna ti di pay nabigbig a suspek a naglibas kalpasan ti pammapatay ngem saanen a nasapulan dagiti nagresponde a pannakabagi ti linteg.

Nakarekobre dagiti inbestigador iti sumagmamano a kapsula iti nakapasamakan ti krimen.

Kanaig daytoy, inwaragawag ni Ramos a maysa a grupo dagiti umili a mangisakit iti biktima ti nangitanggaya iti P50,000 para iti makaited iti impormasion para iti pannakabigbig iti  nangisayangkat iti pammaltog.

Nagsasaruno itay nabiit dagiti pammapatay iti probinsia a nakaaramatan iti paltog.#

Comments are closed.