Footer

Libre a hybrid seeds, naiwaras 1,000 mannalon

CABUGAO, Ilocos Sur – Nagtignay ti nangabak a mayor tapno matulongan dagiti mannalon ditoy  kalpasan a naammuanna nga awan ti maited a subsidy iti bin-i nga irik kadagitoy para iti masungad a panagtatalon.

Impakaammo ni Mayor-elect Eddie “Boy” Cobangbang a mangipaay iti 3,000 kilos a hybrid seeds nga aggapu iti personal a pondona a libre a maiwaras kadagiti mannalon ditoy nga ili.

Agdagup iti 3 kilos a hybrid seeds ti maited iti 1,000 a mannalon ditoy nga ili.

Kinuna ni Cobangbang a maysa daytoy a wagas ti panagyamanna kadagiti kailianna gapu iti panangbutosda kenkuana a kabarbaro a mayor iti Cabugao.

“Maysa daytoy a panangipakitak kadakuada nga iprioridadko dagiti mannalon ditoy ilimi,” kinuna ni Cobangbang idinto nga inyunay-unayna a daytoy a sektor ti makitana a gumawgawawa a matulongan.

Imbalat ni Cobangbang da Dr. Chita Suero nga asawa ni Mayor Diocaesar Suero nga agturposen ti panagtakemna inton Hunio 30 ken incumbent vice mayor Rex Morales para iti kinamayor ditoy nga ili iti kalkalpas nga eleksion.

Sakbayna, impakaammo ni Cabugao municipal rice production officer Nereo Dafroza nga awan ti maited ti municipal government a subsidia ti bin-i a pagay kadagiti mannalon iti masungad a panagtatalon.

Kinuna pay ni Dafroza a ti laeng maaramidan ti opisinana ti panangirekomendana kadagiti mannalon dagiti seed growers a paggatanganda iti certified seeds.

Kinuna pay ni Dafroza a gapu iti kaawan ti tulong a maited ti gobierno munisipal kadagiti mannalon, pattapattana a manipud laengen iti 700 agingga iti 1,000 nga ektaria ti mamulaan iti pagay iti daytoy a panagtatalon.

Kinuna ni Cobangbang nga awan ti pilpilienna a mannalon ket ti laeng datos ti Department of Agriculture ti masurot tapno maipaayan dagitoy iti hybrid seeds.#