Footer

Libro a mangbigbig kadagiti lokal nga agparpartuat, naiyalnag

MAKATI CITY – Binigbig ti gobierno probinsial ti Ilocos Sur dagiti nabatbati pay a nataenganen nga agparpartuat iti probinsia babaen ti inyalnagna a libro iti daytoy a siudad idi Mayo 30.

Inyalnag ti gobierno probinsial idi Mayo 30 ti  TAWID: The Living Treasures of Ilocos Sur kas pammadayaw ken pammigbig  kadagiti nabatbati pay nataengan a nagitultuloy kadagiti kadaanan nga industria iti probinsia.

Nakipaset ti Ilocos Sur iti daytoy nga aldaw iti pannakaiselebrar ti Heritage Month babaen ti naangay a maysa nga aldaw a bazaar iti A. Venue Hall  ditoy a nakailakuan dagiti agduduma a partuat dagiti Ilokano kas iti buneng ken getteng iti Santa, dagiti nalaga a basket ken dapilag manipud iti upland municipalities, asin, tagapulot, longganisa, bagnet, ken ti best seller nga empanada a pinilaan dagiti aggatang a managayat iti lokal a taraon.

Nailako pay dagiti agduduma a souvenir items a nakaimalditan dagiti napapateg a pasamak iti pakasaritaan iti Ilocos Sur a pakairamanan payen ti libro ni Gov. Deogracias Victor “DV” Savellano nga “Ilocos Sur: An Illustrated History”.

Naiyalnag pay iti daytoy nga aldaw ti umuna nga album ti Ilocos Sur Capitol Chorale ken ti “Sika” nga album ni Prince of Operatic Pop Jonathan Badon babaen ti panangpartuat ni Ana Agabin ti Badoc, Ilocos Norte.

Kinuna ni Gov. Deogracias Victor Savellano a malaksid a maipakitada dagiti partuat ni Ilokano iti Metro Manila, makatulong pay ti pasken tapno mabigbig dagiti nataenganen a nabatbati nga agparpartuat kadagiti makuna a living treasures ti probinsia babaen ti pannakaiyalnag ti libro a TAWID: The Living Treasures of Ilocos Sur a nakaisuratan ti pakasaritaan dagiti agindeg iti probinsia a nabatbati a nagitultuloy kadagiti kadaanan nga industria.

“Addan dagiti pimmusay kasta met nga adun ti simmardeng nga agpartuat gapu ta baket wenno lakaydan ken masaksakitdan. Dakkel ngarud a karit kadakami no kasano a mapasubli dagiti agngangabiten a tawid a kinabaknang ti Ilocos Sur. Sapay koma ta babaen itoy a libro, maallukoy dagiti agtutubo nga Ilokano a mangituloy kadagitoy tapno saanda a mapukaw,” kinuna ti gobernador.

Kas pinale a parang itoy maysa nga aldaw a parambak, nairampa dagiti kawes a pakairamanan ti Abel Iluko a dinisenio ni Dita Sandico-Ong, Ilokana nga international designer, kas panangselebrarna iti maika-25 a tawenna iti fashion industry.#

Comments are closed.