Footer

BANNER NEWS: Dakdakkel naganansia agmulmula ti tabako ita a tawen: NTA

VIGAN CITY – Dakdakkel ti naganansia dagiti nagmula iti tabako ita a tawen no maikumpara iti napalabas a tawen, segun iti maysa nga opisial ti National Tobacco Administration.

Daytoy ti sungbat ni NTA Director Teddy Molina iti pammabalaw dagiti mannalon a nabaybay-anda gapu ta P5 laeng ti naituon iti floor price ti tabako ken iti kinababa ti presio ti nakalidad a tabako ita a tawen no maikumpara iti presiona idi napan a tawen.

Iti daytoy a tawen, immabut laeng ti presio ti nakalidad a tabako iti P75 kada kilo idinto a linabsanna pay ti P90 idi napan a tawen.

Ngem inkalintegan ni Molina bayat ti interbio kenkuana ni Danny Tajon a naipatangatang iti DWRS itay nabiit nga iti baet a nababbaba ti average a presio ti adda kalidadna a tabako ita a tawen no maikumpara iti average price daytoy met laeng a klase ti tabako idi napan a tawen, dakdakkel pay laeng ti naganansia dagiti tobacco farmers.

“Babaen ti rekord ti NTA, iti daytoy a tawen, ti rumrummuar nga average a presio ti quality tobacco ket P73 kada kilo,” kinuna ni Molina sana innayon nga idi napalabas a tawen, “ti average price ti quality tobacco ket P84 kada kilo”, nababbaba iti P11 kada kilo.

Ngem inyunay-unay ni Molina a nupay nababbaba ti average price ti nakalidad a tabako iti daytoy a tawen, bimmassit met ti nabusbos ni mannalon kadagiti inputs kas iti abono.

“Gapu ta nanginngina nga amang ti inputs idi napan a tawen, nakagasto ni mannalon iti P15,300 kada ektaria idinto nga iti daytoy a tawen, nalaklaka ti fertilizer ket nakagasto laeng daytoy iti P9,980 kada ektaria,” panangilawlawag ni Molina.

Kinuna ti direktor nga idi napan a tawen, kas maibatay iti sumar ti NTA ken no sinurot la ketdi ni mannalon ti inrekomenda ti ahensia a teknolohia, nakaganansia ni mannalon iti neto a P30,000 kada ektaria idinto nga ita a tawen, nakaganansia daytoy iti neto a P45,000 kada ektaria.

“Saan a presio ti pagpapatangan no di mano ti net income ni apo mannalon…” kinuna ni Molina.

Iti tripartite conference iti nagbaetan dagiti mannalon ken traders ken manufacturers, dinawat dagiti agmulmula iti tabako ti P20 kada kilo a maituon iti P61 kada kilo a floor price ti tabako.

Idi damo, P2 kada kilo laeng ti kayat dagiti traders ken manufacturers a mainayon iti floor price ti tabako ngem ninayonanda met laeng idi agangay iti P3 tapno agbalin a P5 kada kilo ti fllor price daytoy a produkto.

Sakbay ti eleksion, agdagup iti P6 bilion ti rinuk-atan ti gobierno nasional a bingay dagiti tobacco poducing provinces, ket  P3 bilion ti napan iti Ilocos Sur agsipud ta daytoy ti kadakkelan iti produksion iti tabako.#