Footer

Botika ng Barangay di maited no di agsanay dagiti mangimaton: Vice Jerry

VIGAN CITY – Saan a maited ti botika ti barangay no di agsanay nga umuna dagiti mangimaton iti botika, daytoy ti impaganetget ni Vice Gov. Jerry Singson itay nabiit.

“Nakalukat ti ruangan kadagiti barangay nga awan pay botikana no la ketdi agsanay dagiti mangimaton,” kinuna ni Singson idinto nga innayonna a sisasagana nga agpaseminar uray maymaysa ti agsanay tapno masigurado nga agtultuloy daytoy a programa.

Impalgak ti bise gobernador nga agpategen  iti nasurok a P19.2 milion dagiti botika ti barangay a naiteden kadagiti barbarangay ditoy probinsia sana inyunay-unay a puntiriana a maikkan dagiti amin a barangay iti botika nga addaan ag-agas nga agpateg iti P25,000.

“Importante diay seminar tapno awan ti pambar,” kinuna ni Singson sana dinakamat nga adda dagiti naipasdek a botika ti barangay iti napalabas ngem saanda a nagtultuloy gapu iti mapapati a saan a nasayaat a pannakaimatonda.

Kinuna ni Singson a tungpal biag ti botika ng barangay ket kasapulan nga aglasat dagiti mangimaton iti panagsanay tapno saanda a mabangkrap.

Kanaig daytoy, inwaragawag ti bise gobernador ti pannakaisayangkat ti seminar iti ili a Sta. Maria ken Burgos santo ti San Esteban ken Santiago a pakaiyadalan iti pannakaimaton ti botika sakbay a maited kadakuada. Maitudingto met ti paseminar ti Sta. Lucia iti mabiit.

“Uray no asinonto dagiti gobernador ken bise gobernador, agtultuloyto  dagitoy,” kinuna ni Singson sa innayon a adda met dakkel a responsibilidad dagiti bumarangay tapno agballigi daytoy a gannuat.

Programa ti national government ti pannakaipasdek dagiti botika kadagiti barangay ket naiyussuat daytoy ditoy probinsia babaen ti initiatibo ti bise gobernador tapno maaddaan dagiti bumarangay iti botika a pakailakuan iti nalaka nga agas ken asideg a gumatanganda iti emerhensia a pagkasapulanda iti agas.#