Footer

Dagiti Labid iti Nagkurusan (Umuna a paset)

Manipud iti iddak a masmaspig a papag, bimmangonak ta medio dagaangenak. Alas siete pay laeng ti bigat iti dayta a Sabado ngem mariknan ti bara nga iyeg ti kalgaw. Talagan san a saan a maigawid ti panagbaliw ti panawen. Global warming a kuna diay tibi ni Baket Itang, tay kaarrubami a reyna ti tsismis ditoy lugarmi a Cabsil. Kanayonkami a mapan makibuya ta dakkel diay tibi a pagbuyaanmi. Kaykayat met ni Baket Itang no ipadpadamagmi kadagiti nagannakmi ti kasla pagsinean a tibida.

Nalukmeg  ken pandek ni Baket Itang a kanayon a nakaaritos iti dangling ken napno iti singsing dagiti ramayna. Sangkaparammagna a naggapu ken lakayna a Pascual nga uray no agtawenen iti nasurok innem a pulo saanna pay a mapanunot ti agawid manipud sadiay Riyadh a pagtrabahuanna.

Agtawen metten ni Baket Itang iti innem a pulo ngem naparagsit pay laeng. Huston sa diay kunkuna dagiti kalugaranmi nga energy drinkna dagiti sayangguseng a mangmangegna iti agmalem. Aw-awaganda iti mensahera iti tsismis ta manipud iti krosing dita haywey agingga iti Nagbasaran, ti kabangibangmi a barangay iti daya, arigna ammona amin a pakasaritaan ti biag dagiti tao.

Maysa a bigat, manipud iti paraanganmi, napasungadak ti baket a magmagna nga agpalaud. Kas iti sigud a nakabidang manen iti nadulpet a tualia. Nalabit a mapan manen dita krosing. Binigat, paseten ti panagbiagna ti panagestambayna iti waiting shed tapno agobserbar kadagiti estudiante  ken kalugaranmi a mapan iti kabisera. Iti met malem, iti talipapa iti sango ti eskuelami nga elementaria ti ayuyangna tapno siputanna ti garaw dagiti mangisursuro ken dagitay estudiante ti hayskul a sumalog iti pagadalan iti sagpat ti turod. Madillawnanto amin a di mangan-ano manipud panagaruatda agingga iti aramidda sananto mapan isarsarita kadagitay padana a “komentarista” ti barangay. No koma adda bitbitna a tambor ay!  atiwenna koma ti bombo radyo.

Apaman a nakalabes iti inaladanmi, dinagdagusko met ti rimmuar tapno surotek. Sigurado, adda manen  mapasamak itoy nga ipapanna iti krosing ket dayta ti kayatko nga ammuen.

“Papanam a bigbigat, sika Ligaya? Dikan sa pay naggisigis,” nangngegko a sinaludsod ni Nanang ngem diakon nasungbatan ta isu metten ti panagtarayko nga agturong iti krosing.

Nadanonko ni Baket Itang a kaduana ni Baket Insiang, ti ka-tag teamna.  No kasla insaltek a kuribot ni Baket Itang, kasla impasiki a bigao ken  natayag met ni Baket Insiang. Kulay naranghita ti buokna ta kanayonna a tintinaan. Huston sa ti pagsasaao a berds wit da seym peder plak togeder ta agpada dagiti dua a “komentarista” ti barangay. Mayat man ti panagginginnarikgikda bayat ti panangipangato- panangipababada ti panagkitada ken ni Manang Saniata a cashier ti groseria diay kabisera.Nakatakder daytoy iti ballasiw ti haywey. Agur-uray iti paglugananna a mini bus.

Napanak nakitugaw kaniada iti waiting shed tapno nalawag a mangngegko ti pagsarsaritaanda.

“Ammom atanud, kunada man nga agsusukot ti nobio dayta a Saniata,” inyabbong ni Baket Itang ti dakulap iti ngiwatna kagiddan ti panangiyarasaasna iti padana a baket.

“Kasta aya?” nagbullad  dagiti siguden a dadakkel a mata ni Baket Insiang sa nagngirsi ket medio naglugad ti sumilap a pustisona.

“Ay! Patiennak, atanud, ta diay apok ti nakakita. Isu gayam a rabiin no makaaw-awid, sika, ta mapan pay no kua sumurot iti no asino ditan,” inyayug manen ti baket a nalukmeg kagiddan ii panangibakalna ti panagkitana iti balasang a puon ti topikoda a lumugluganen iti nagsardeng a mini bus.

“Sabagay, kitaem ti bagina, Atanud Itang, kasla nasagsagen ta agbuy-ong payen. Idi siak ti kasta ti tawenna, ay, saan a panangipangas ngem adu a babbaro ti mapataliaw no kasdiay a lumabasak iti ummongda,” uray la nagsapri ti ngiwat ni Baket Insiang iti panagkatawana ket dandani naipugsona ti pustisona a pirak. Imbag ta naamilna a dagus ti dilana isu a naipuesto met laeng.

“Ha! Ha! Ha! Nasaomom, Atanud Insiang. Dakkel pay ket ngata a ti posibilidadna a nagpaikkaten dayta. Ket no agsakang payen. Sabali a talagan ti agtutubo ita. Saanen a kas idi datayo a naemma ti babbalasang.”

Naginnapir dagiti dua. Mayat manen ti bigatda a nakapaginnestoria iti biag ti kalugaranda.

(Adda tuloyna)