Footer

ITI INDAYON NI LAGIP: Ti ayat ti maysa nga ubing

Nagbalin a pakariribukak ti panagdaton ni Arthur. Mariknaak a maip-ipitak iti nagbaetan ti dua a bato: iti maysa a bangir, ni Arthur, iti sabali a bangir dagiti annakko, nangruna ni Angelo.

Nasaritak daytoy ken ni Cely iti naminsan a panagmerienda iti kantina.

“Mariribukannak,” nakunak. “Matinnag metten ti riknak ken ni Arthur ngem dagiti annakko ti pampanunotek. Amangan no dida makatunosan ni Arthur.”

“Loka, apay a problemaem dayta? No ay-ayatem ni Arthur, apay a dimo tungpalen ti ipitpitik ti pusom?”

“Naikay ni Angelo kenkuana. Mariknak a dina kayat ni Arthur nga agbalin nga ama.”

“Kasta no damdamo. Ngem no asawamton ni Arthur, agkatunosandanto ken ni Angelo.”

Diak nagtimek. Nagsennaayak ketdi.

“No siak ti sika, sungbatakon ni Arthur,” kinuna ni Cely. “Dikanton makasarak iti kas kenkuana. Ken maysa, kasapulan dagiti annakmo iti ama a mangibagnos kadakuada iti kinaganusda.”

“Diak ammo ngem adda panagtukiadko a mangaklon kenkuana.”

“Loka, maminsan laeng a dumteng ti kasta a gundaway. No palusposam pay ni Arthur, baka pagbabawyam iti masakbayan.”

“Panunotek pay a nalaing,” nakunak laengen.

Naglabas dagiti bulan. Iti dayta a panawen, pimminget ni Arthur a nagdaton kaniak.

Maysa a malem, sinungbatak ni Arthur. Napalalo ti ragsakna.

“Ikarik a dimonto pagbabawyan ti panangsungbatmo kaniak,” kinunana.

“Natingitingkon ti riknak. Agayatak metten kenka,” nakunak.

Nagbalin a namaris dagiti simmaruno nga aldawmi. Iti malem, dagasennak iti pagtrabahuak ket itulodnak iti kaserak. Addan bitbitna a tiniendana. Iti metten kaserak ti pangrabiianna.

Naragsak ti panagsasangomi iti lamisaan. Adu dagiti estoriana kadagiti annakko ket magustuanda a denggen.

Ni laeng Angelo ti naulimek iti pannanganmi. Kalpasan ti pangrabii, agpaknin iti kuartona. Saan metten a rummuar pay.

“Adayo kenka ni Angelo,” nakunak ken ni Arthur. “Ikkam koma iti naan-anay a tiempo a mangisagana iti bagina iti panagbalintayo a maymaysa a pamilia.”

Nagtung-ed ni Arthur. “Maawatak ti riknana. Iti dayta a tawenna, kasapulanna ti pannakaawat. Ngem dumtengto ti panawen a maamirisna a maysa nga anak ti pangibilangak kenkuana uray addanton annakta.”

“Sika met, annak ti ibagbagamon ket dita pay nagkasar,” kinuddotko ti bakrang ni Arthur.

Maysa a malem, tiningitingko ti rikna ni Angelo. Agbasbasa ti leksionna iti abay ti tawa.

“Ibagbagan ni Arthur nga agkallaysakamin,” kinunak.

Kellaat a nayurit ti kusilap iti mata ni Angelo.

“Diak kayat nga agbalin nga asawam!” nakunana. “Diak kayat nga adda sukat ni dadi! Isunto laeng ti dadik, awanen ti sabali!”

(Adda tuloyna)

Comments are closed.