Footer

Nakasaksak a charger ti selpon nakagapu iti uram iti Candon public market: BFP

CANDON CITY – Masuspetsa a nangrugi ti uram iti maikadua a kadsaaran ti maysa a residensial a pasdek iti agarup 9:50 ti rabii ti Hunio 7 ket nagkayamkam ti apuy kadagiti sumagmamano nga establisimiento ditoy.

Kinuna ni Senior Fire Officer Modesto dela Cruz ti Bureau of Fire Protection ditoy siudad a mapapati a nagtaud ti uram iti nakasaksak a cellphone charger iti akinngato a kadsaaran ti residential building.

Segun ken ni dela Cruz, adda tallo a boarding house iti maikadua a kadsaaran idinto a babassit a business establishments ti adda iti baba.

Nauram ti nasao a residential building karaman dagiti sumagmamano a pasdek negosio idi rabii ti Hunio 7 a dimmapuan ti di pay ammo ti pategna a tagilako ken sanikua.

Karaman a nauram ti dua a dakkel a grocery stores, dua a beauty parlor, bakery ken sumagmamano pay nga establisimiento iti tiendaan publiko ditoy a masarakan iti Barangay San Isidro ditoy.

Segun iti inisial a report manipud ti Bureau of Fire Protection ditoy siudad nga idadauluan ni BFP Senior Inspector Nemesio Valenciano, nauram ti S4 Grocery Store, Tessie’s Store, B5 Bakery ken partial a nauram ti Julie’s Bakeshop ken dua a di nainaganan a beauty parlor.

Iti pannakaisurat daytoy, madama pay a madagdagup ti pateg dagiti dimmapo a sanikua ken tagilako.

Kinuna ni Senior Fire Officer 2 Modesto dela Cruz a dakkelen ti apuy idi makadanonda iti yan ti uram agsipud ta naaramid iti light materials ti residential building.

Kinuna ti fire officer a nakontrolda ti apuy kalpasan ti dua nga oras.

Timmulong iti pannakadepdep ti uram dagiti bombero manipud ti Tagudin, Sta. Cruz, Santa Lucia, Lidlidda, Santa Maria, Narvacan, Bantay, ken Vigan City.

Daytoy ti maikadua nga uram a napasamak iti dua a siudad ditoy Vigan iti las-ud ti nasurok makalawas laeng.

Idi Mayo 30, nauram met ti maysa a pagtagilakuan iti tiendaan publiko ti Vigan City.

Nauram ti Cristy’s Textile ket dimmapo dagiti aruaten ken kurtina a tagilako ditoy.

Mapapati a kandela ti nakaigapuan ti uram.#