Footer

Panangtratar ti Panagbalbaliw ti Klima (Tuloyna)

Kasapulan dagiti nasamay nga addang a panangtratar kadagiti parikut nga imbunga ti panagbaliw ti paniempo. Nasaysayaat pay ngata no makipaset amin iti daytoy a panangsango kadagiti parikut ket adalen a nalaing dagiti tuodan ti amin ken adalen dagiti epektibo a wagas a pangsolbar kadagitoy. Saan ngata a nasaysayaat nga isayangkat ti panagtignay kadagiti naadal a wagas ngem ti agpatingga laeng dagitoy kadagiti bibig? Napimpintas ti agtrabaho kalpasan ti panangadal kadagiti parikut a simmangbay ngem ti agpatingga laeng iti bibig dagiti ingpen.

Kas koma iti panangpalangto iti aglawlaw. Kasapulan ti panagmulamula kadagiti kaykayo, kadagiti man agbungbunga iti makan ken uray kadagiti saan nga agbunga ta makatulongda met a mangpanglangto iti aglawlaw. Dagiti kaykayo lapdanda ti panagreggaay ken panagkusukos ti daga. Lapdanda ti kellaat nga agus ti danum wenno flashflood iti panagbabagyo. Palamiisenda ti aglawlaw. Gapu kadagitoy a kaykayo, mapangnamnamaan met ti kinadalus ti angin nga angsen. Gapu kadagiti kaykayo, mapangnamnamaan ti pannakasaluad ti ubbog ken dadduma a taudan ti danum. Dagitoy koma ti kangrunaan nga ibudi iti panagbiag, iti lifestyle, ti panangpalangto ti aglawlaw. Daytoy koma ti maidarirag nga aramiden ti amin.

Ti solid waste management ti maysa a dakkel a parikut iti agdama. Saan a masolbasolbar daytoy a parikut kadagiti dadduma a siudad ken uray kadagiti dadakkel nga ili wenno iti matatao a luglugar. Nasken a maipatungpal ti Solid Waste Management Act. Dakkel a parikut dagiti agkaiwara a basura nangruna kadagiti plastik a nagsupotan ken dadduma a naaramid iti plastik. Nupay adda dagiti addang ken wagas a pangrisut iti problema, kasla agkurang pay laeng ta awan ti naan-anay a pannakipartisipar ti amin. Kasapulan koma a bumadang amin nga umili. Ta no saan,  adu ti ibungana a perwisio daytoy a panagbaybay-a. Nasken a papigsaen met ti gobierno ti kampaniana maipapan itoy. Nasken a naan-anay ti panangilungalong nga ad-adu ti masagrap nga imbag iti naannayas a panangtratar kadagiti basura. Ta no saan a nasayaat ti panangtratar kadagiti basura, kumaro met ti polusion. Ti nagduduma a kita ti polusion. Ti makadangran unay a polusion.

Ilungalongtayo ti pollution prevention. Kasapulan dagiti addang a panangprebentar ti polusion. Air pollution. Water pollution. Environment pollution. Nasken a naing-inget ti pannakaipagna dagiti wagas a panglapped kadagitoy. Nasken ti nasamsamay ken epektibo a wagas no kasano a lapdan ken pengdan dagitoy. Ta no saan, dakkel la ketdi ti ibungana para iti daras a panagbalbaliw ti klima.

Dakkel unay ti maitulong ti coastal resource management iti panangtratar ti panagbalbaliw ti klima. Napateg ti panangmanehar uray kadagiti ngarab dagiti dadakkel a karayan wenno dagiti karayan a sumalpot iti sabangan.

(Adda tuloyna)

Comments are closed.