Footer

Tulong ti NBI para iti pannakasolbar panagtakaw iti pawnshop nakiddaw

CANDON CITY – Nagpatulong ti polis ditoy iti National Bureau of Investigation para iti madagdagus a pannakasolbar ti kaso ti panagtakaw iti maysa a pagsaldaan ditoy itay nabiit.

Iti interbio kenkuana ti DZTP Radio Tirad Pass, kinuna ni Police Supt. Marlo Castillo, hepe ti polis ditoy, a nagkiddawda iti tulong manipud iti NBI tapno tumulong ti nasao nga ahensia iti inbestigasion para iti nadardaras a pannakasolbar ti panagtakaw iti Wel Gems Pawnshop, kukua ni Marilou dela Cruz, 46, residente iti Barangay Tablac ditoy siudad.

Agdagup iti P1.2 milion a kuarta ken alahas ti natakaw iti nasao a pagsaldaan a masarakan iti Barangay San Isidro ditoy siudad idi Hunio 7.

Dinadael dagiti mannanakaw ti vault sada kinasakas ti P200,000 a kuarta ken mapattapatta nga agpateg iti P1 milion nga alahas.

Di pay nabigbig dagiti mannanakaw agsipud ta awan ti CCTV a naikabit iti nasao a pawnshop, awan ti guardia, ken awan ti alarm system daytoy a nagpakdaar koma iti kaadda ti panagtakaw.

Kanaig daytoy, indarirag manen ni Castillo kadagiti negosiante ditoy siudad ti panangikabitda iti kamera ken security alarm system kadagiti commercial establishments ditoy tapno adda pagguddengan dagiti mannanakaw a mangiwayat iti dakes a panggepda.

Naammuan nga iti napalabas, adda tignay ti kapolisan ken ti konseho ditoy siudad a makabitan dagiti commercial establishments iti CCTV, alarm system ken panangalada iti security guard ngem adu kadagiti negosiante ti nangibaga a saanda a kabaelan dagitoy.

Iti pakpakauna nga inbestigasion dagiti polis, nakastrek dagiti mannanakaw iti vault babaen ti panangdadaelda iti flooring ti comfort room ken drainage canal iti kabangibang daytoy nga establisimiento sada binuttawan ti septik tank a kumamang iti pawnshop.

Daytoy met la ti mapapati a rimmuaran dagiti mannanakaw iti panaglibasda.

Nakarekobre dagiti inbestigador iti guantes ken bareta iti uneg ti vault a mapapati a nabati dagiti mannanakaw.#

Comments are closed.