Footer

Badigard ti politiko, fish dealer, napapatay

NARVACAN, Ilocos Sur – Agtultuloy latta dagiti kaso ti pammapatay ditoy probinsia iti  laksid ti pammilin ti provincial director ditoy a pannakaiwayat ti naing-inget a kampania kontra kriminalidad.

Dua pay a nagsina a pammapatay a nakagudasan ti maysa a badigard ti politiko ken maysa a fish dealer ti naipadamag a naisayangkat itay nabiit.

Napapatay ni Dante Solar, 42,  residente iti Barangay Dardarat, Cabugao, Ilocos Sur, personal a badigard ti  maysa a politiko iti malem ti Hunio 13 iti Barangay Baclig, Cabugao, Ilocos Sur babaen dagiti uppat a lallaki a naglugan iti dua a motorsiklo.

Naideklara a natayen ni Solar idi maidanon iti Pira Clinic and Hospital a nakaitarayanna.

Iti inisial nga inbestigasion,  naisayangkat ti pammapatay iti asideg ti Octagon cockpit iti Barangay Baclig ditoy nga ili bayat a nakalugan ni Solar iti likudan ti drayber ti maysa a traysikel.

Segun iti report, dua a motorsiklo ti nagluganan dagiti uppat a suspek a nangpaltog ken ni Solar. Naglibas dagiti di pay nabigbig a suspek iti di ammo a direksion.

Nakasarak dagiti inbestigador iti uppat a kapsula manipud iti kalibre 45 iti nakapasamakan ti crime scene.

Personal a badigard ni naabak a para mayor Dr. Chita Cordero, asawa ni Mayor Diocaesar Suero nga agturposen ti terminona iti daytoy Hunio 30.

Kitkitaen dagiti polis no adda pakainaigan iti politika ti nasao a pammapatay.

Kabayatanna, maysa a fish dealer ti napapatay iti sanguanan ti tiendaan ti Barangay San Jose ditoy nga ili idi parbangon ti Hulio 14.

Saanen a naidanon iti ospital ti biag ni Adorado Garote, 52, naasawaan, residente iti Barangay Dunglayan, Santa Maria, Ilocos Sur, gapu iti sugatna iti ulona.

Segun iti report, madama a daldalusan ni Garote ti luganna nga Izuzu Elf idi immasideg ti di pay nabigbig a lalaki ket pinaltoganna ti biktima a nakapuntaan ti makannigid a matana.

Kalpasan ti pammaltog, naglugan ti suspek iti agur-uray a motorsiklo, kaduana ti sabali pay a kaduana a mapapati a look-out iti pannakaisayangkat ti krimen ket naglibasda iti saan pay nga ammo a direksion.

Kalibre 45 ti naaramat iti pammapatay kas maibasar iti kapsula a narekobre iti nakapasamakan ti krimen.

Naitaray ni Garote iti Central Ilocos Hospital ngem naideklara nga awanen ti biagna.

Madama ti inbestigasion no ania ti motibo iti pammapatay.

Itay nabiit, imbilin ni Police Senior Supt. Eduardo Dopale, Jr. kadagiti amin a hepe ti polis iti probinsia ti naing-inget a kampania kontra iti kriminalidad iti sanguanan dagiti nagsasaruno a pammapatay iti probinsia.

Imbilin pay ni Dopale a maipakat ti proactive anti-criminality campaign kas iti naing-inget a pannakaiwayat ti police checkpoint nangruna kadagiti agkalubbon a nakamotorsiklo, no plate no travel policy, Operation Kapkap Bakal kadagiti amin a paginuman ken maximum police visibility nangruna kadagiti lugar a nakapasa-makan kadagiti pammapatay.

Agdagup iti 23 dagiti kaso ti pammapatay iti bulan ti Abril ken Mayo a nakaaramatan iti paltog idinto a 6 laeng ti nasolbar kadagitoy wenno iti 26.08 a crime solution efficiency.#