Footer

KBP iti PNP: nadardaras pannakasolbar media killings

DAGUPAN CITY – Indagadag ti Kapisanan ng mga Brodkaster ng Pilipinas (KBP) ti madagdagus a pannakasolbar ti nagsaruno a pannakapapatay dagiti dua a kameng ti media itay nabiit.

Iti news report manipud iti Bombo Dagupan a naipatangatang Bombo Radyo Vigan idi Hunio 17, kinondenar  ni KBP President Herman Basbaño a maysa a dakkel a disnog iti nawaya a panagiwarnak ti pannakapapatay da Joselito Agustin, broadcaster ti DZJC Aksyon Radyo Laoag  ken Desiderio Camangyan, anchor ti Sunrise FM iti Mati, Davao Oriental, itay nabiit.

“I condemn in the strongest possible terms the barbaric attack that targeted innocent media practitioners. This barbaric and vicious attack on innocent journalist deserves the condemnation of every sector,” kinuna ni Basbaño.

Kanaig daytoy, indawat ti KBP president ken bise presidente pay ken chief operating  officer ti AM Division ti Bombo Radyo Philippines, kadagiti maseknan nga otoridad a mangiwayatda kadagiti madagdagus nga addang tapno matiliw dagiti nangisayangkat iti krimen tapno maikkan iti hustisia dagiti biktima ti pammapatay.

Kabayatanna, napag-aanamongan iti miting dagiti kameng ti KBP-Ilocos Norte ti panangipaayda iti tulong a pinansial iti pamilia ni Agustin.

Boluntario ti tulong nga ipaay dagiti estasion ti radio iti napanawan ti radio broadcaster.

Mangipaay pay ti KBP iti P25,000 kas burial assistance ken ni Agustin agsipud ta kameng daytoy iti nasao a gunglo.

Impanamnama met ni Governor-elect Imee Marcos ti panangitedna iti tulong iti napapatay a broadcaster.

Napaltogan ni Agustin kabayatan ti panagdaliasatna iti national highway a sakup ti Barangay Barit, Laoag City idi 9:45 ti rabii ti Hunio 16.

Natay ni Agustin iti ospital a nakaitarayanna gapu kadagiti grabe a sugatna.

Impatay met ni  Camangyan ti sugatna iti ulo gapuanan ti pannakapaltogna bayat ti maysa a pakontes iti sanguanan ti asawa ken anakna.

Kitkitaen dagiti inbestigador no adda pakainaigan dagiti komentario ni Camangyan mainaig iti illegal logging iti pannakapapatayna.

Nagapela pay ni Basbaño iti gobierno a mangaramid kadagiti pamuspusan tapno agsardengen ti agtultuloy a pannakapapatay dagiti inosente a kameng ti media iti pagilian a kaadduanna ti saan pay a naikkan iti hustisia.#

Comments are closed.