Footer

Mangngalap a biktima ti fish kill, dida pay naawat tulong pinansial

CAOAYAN, Ilocos Sur – Ur-urayen pay laeng dagiti mangngalap ditoy ti tulong pinansial ti gobierno munisipal gapu iti panagpatay dagiti tarakenda a lames idi  aggibus ti bulan ti Abril daytoy a tawen.

Ngem kinuna ni Municipal Agriculturist Marilou Factor a nabayagen a naisubmite iti opisina ti mayor dagiti kasapulan a dokumento ken ti listaan dagiti mangngalap a naapektaran iti fish kill iti Mestizo River a sakup ti Barangay Don Lorenzo Querubin ditoy nga ili.

Manamnama nga umawat dagiti mangngalap iti sag-P3,000 a tulong pinansial gapu iti dakkel a pukawda maigapu iti panagpatay iti fish cages dagiti tarakenda a tilapia.

Natakuatan laengen dagiti mangngalap nga adda fish cagesda iti Karayan Mestizo sa sakup ti Don Lorenzo Querubin idi Abril 28 a timpaw dagiti tarakenda a tilapia.

Nadumaduma dagiti mapapati a gapu iti panagpatay dagiti lames kas iti napigsa a panagtudona idi kanikadua nga aldaw sakbay ti fish kill, ti narugit a danum a timmapuak iti karayan manipud iti kanal, ken iti kinapudot ti panawen gapu iti mapaspasaran idi nga El Niño phenomenon.

Uray iti paset ti karayan a sakup ti Barangay Tamag, nagpatay met dagiti taraken dagiti mangngalap a tilapia.

Segun ken ni Ariston Banez, presidente ti Fishermen’s Association ti Don Lorenzo Querubin, dakkel ti pukaw dagiti nagtaraken gapu ta mailako koma dagiti tilapia iti panagpiesta ti Vigan City iti umuna a lawas ti Mayo.

Mapattapatta nga agdagup iti P300,000 ti pukaw dagiti mangngalap nga adda fis cagesda iti Karayan Mestizo ditoy nga ili ken iti Vigan City.

Naammuan nga agdagup iti 12 a mangngalap ti karaman iti listaan a maipaayan iti sag-P3,000 a tulong pinansial.

Naitantan ti pannakaited ti tulong pinansial kadagiti naapektaran a mangngalap agsipud ta nakamatan iti election ban gapu iti naisayangkat a national ken local elections idi Mayo 10, 2010.

Nupay kasta, mangnamnama ni Factor a maitedto met ti nasao a gatad kadagiti fish cage owners iti mabiit.