Footer

Sidebar: panagtakaw iti motorsiklo, nagraira manen iti Vigan City

VIGAN CITY- Ti nagsasaruno a panagtakaw iti motorsiklo ti maysa kadagiti kangrunaan a pakaseknan nga indagadag ni Mayor Eva Marie S. Medina iti kapolisan nga ipaayan iti imatang, segun ken ni OIC Chief of Police ditoy Police Chief Inspector Ernesto Navarro, Jr.

Ni Navarro ti nadesignaran nga OIC a hepe ti polis ditoy kalpasan ti panagretiro iti serbisio ni Police Senior Supt. Medardo de Guzman idi Mayo.

Sabali pay a motorsiklo ti naireport a natakaw ditoy  siudad idi Hunio 14.

Inreport ni Jenalyn Tique, 29, residente iti Barangay Pantay Daya ditoy siudad, a natakaw ti motorsiklona nga imparkingna iti asideg ti maysa a pagtagilakuan ditoy siudad.

Segun ti biktima, imparkingna ti luganna iti sanguanan ti Novo sa immuneg iti pagtagilakuan tapno ag-shopping.

Idi sublienna ti motorsiklona, awanen daytoy.

Nagsawar dagiti polis ngem saandan a nasapulan ti motorsiklo.

Sakbayna, idi Hunio 13, inreport ni Jenalyn Navarro, 25, empleado ti Mart One ditoy, agnaed iti Barangay Nagsangalan, Vigan City, iti polis a natakaw ti motorsiklona nga imparkingna iti laud a paset ti nasao nga establisimiento idi simrek iti trabahona.

Segun iti biktima, adda pay ti motorsiklo idi napanna tsinek-ap iti agarup alas dos ti malem ngem idi aggawiden iti alas singko, naduktalanna laengen nga awanen ti luganna iti nakaiparkinganna.

Kabayatanna, narekobre ti maysa a motorsiklo a natakaw iti sanguanan ti maysa a pasdek ditoy siudad itay nabiit.

Nasarakan ti motorsiklo ni Gary Raganit, residente iti Barangay Pudoc, San Vicente, Ilocos Sur, a naabandona iti igid ti karayan a sakup ti Barangay IV ditoy siudad.

Idi napan a bulan, dua a nagsina a panagtakaw iti motorsiklo a naiparking iti sikigan ti maysa nga otel iti Heritage Village ti naireport iti polis ditoy.

Natakaw ti XRM a motorsiklo ni Wilmer Feria, 17, taga-Bulag West, Bantay, Ilocos Sur ken ti chopchop a motorsiklo ni Sharon Raquepo nga imparkingda iti sikigan ti Cordillera Inn a sakup ti Barangay 1 ditoy siudad.

Awan pay ti natiliw a suspek kadagiti nasao a panagtakaw.#