Footer

TARAON TI PANUNOT: Sapata (Tuloyna)

Iti inaldaw a panagpasada ni Lino, adu dagiti makadennana. Naruay dagiti padasna kadagiti pasaherona, nangruna dagiti babbai.

Kinapudnona, adda bullilisingna iti maysa a beerhouse. Ipangpangasna pay kadagiti kakaduana a drayber ti kinalapsat ti bullilisingna. Sangkadullitna ti kinasiglatna a nangtiliw iti ubing a bullilisingna.

“Basta driver, sweet lover!” sangkakunana.

Pamrayan laeng dagiti kakaduana ti agwingiwing no kasta nga aggiinomda a rugianen ni Lino ti agpangkusaw.

Naminsan, nakasarak ni baketna iti ababa a surat iti bulsa ti pantalon ni Lino. Nalipatan daytoy nga impalladaw. Nakalanad iti surat ti maysa nga agnagan Merly nga agkitada ken ni Lino iti sanguanan ti maysa a pagadalan. Kasapulan kano ti babai iti tallo a ribu ta aggawid ket masakit ti inana.

Saan a dinakdakamat ni Anneng ti naduktalanna. Nagpaliiw ketdi. Agsuspetsan no apay a bassit ti yin-intrega ni lakayna a mapasadaanna. Adu ti yagal ni Lino: nabtakan iti pilid, nadadael ti preno, bassit ti mapasada ta awan ti klase ken no ania la ditan a pagpambarna.

Dimteng ti aldaw a panagsarak da Lino ken ni Merly. Nasapa nga immulog ni Anneng. Awan pay alas nuebe, addan iti nagkurusan nga agpadpadaan. Alas nuebe y media ti nailanad a panagkita ti asawana ken ti bullilisingna.

Iti eksakto alas nuebe y media, nasaripatpatanna ti taksi ni lakayna a nagpaigid iti saan nga adayo manipud iti sango ti pagadalan. Dimsaag ni lakayna. Kasla awan aniamanna a nagturong iti maysa a panganan. Masinunuo itan ni Anneng a masansan a ditoy ti pagsarsarakan ni lakayna ken ti bulilisingna.

Naguray ni Anneng iti sangapulo a minutos sa simrek iti restaurant. Nakitana ti lakayna ken maysa a babai a mangmangan iti suli ti restaurant.

Uray la bimsag ni Lino idi mataldiapanna ni baketna.

Nabayag a minatmatan ni Anneng ti asawana. Kalpasanna, sintimek a pimmanaw met laeng.

Idi aggawid ni Lino, nakaimpaken dagiti lupotna iti sango ti ruangan. Uray kasano ti panagtugtogna, awan ti nangpastrek kenkuana. Uray dagiti dua nga annakna, saan a pinalubosan ti inada a rummuar.

“No sina, di sina!”nakuna ketdi ni Lino. Binitbitna ti maleta ket nagturong iti kasera ti bulilisingna. Saandan nga inlimed ti panagkabbalayda.

Ngem iti biag, saan amin a panawen ket napno iti katawa. Adda met dumteng a saning-i.

Ti insapsapata idi ni Lino a bumtak ti aprona no agul-ulbod ken ni baketna ket pimmudno. Idi damo, nakarikna iti panagkakapsut. Ngem dina intaltalek. Bisin la dayta, nakunana. Ngem idi agangay, masansan metten. Naiyospital. Naduktalan a nakaro unay ti sakitna iti apro.

Dakkel a problema ni Lino ti busbosenna iti ospital. Awan urnongna ta gastadora ni Merly.

Yan ti paitna, idi awanen ti madilamutan ti kabbalayna kenkuana, simmuroten iti sabali a lalaki!

Maysa a malem, naklaat ni Lino idi makitana ti sangailina. Ni Anneng ken ti dua nga annakda.

Lalaki ni Lino ngem iti dayta a darikmat, nagsangit iti napalaus a panagbabawina.

“Saankan nga agsangit,” nakuna ni baketna. “Nabayagen a pinakawandaka. Padasentayo manen a bukelen ti pagtaengantayo…”

Isu a no maminsan, kailian, no adda nakabasolam, saanmo a paglibakan a dakamatem pay ti Dios tapno makalusotka laeng.

Kuna ti Nasantuan a Biblia: “Dimo paglikudan ti karim, ngem tungpalem ti sinapataam iti Apo nga aramiden. Ngem ita, ibagak kadakayo a dikay agsapata a pulos: diyo pagsaksi ti langit ta isu ti trono ti Dios wenno ti daga ta isu ti pagbatayan dagiti sakana wenno ti Jerusalem ta isu ti siudad ti naindaklan nga Ari. Dimo met pagsapata ti ulom agsipud ta dimo mapapuraw wenno mapangisit iti uray maysa laeng a buokmo. Kastoy laeng ti kunayo: no wen, ‘wen’; no saan, ‘saan’, ta agtaud iti managdakdakes ti aniaman nga inayonyo.” #

Comments are closed.