Footer

2 natay iti nagsina nga aksidente

STA. LUCIA, Ilocos Sur – Natay ti maysa a motorista kalpasan a nakidinnungpar ti luganna iti maysa a van iti Barangay Angkileng ditoy nga ili idi Hunio 23.

Natay a dagus ni Judy Rico Valdez, 19, baro, residente iti Barangay Caburao, Santiago, Ilocos Sur gapu iti sinagrapna a grabe a sugatna iti aksidente.

Segun iti report, agdaldaliasat da Valdez ken ni Boots Sabalo, baro, residente iti Barangay Langlangca, Candon City a nakalugan iti sabali a motorsiklo ket iti pagkurbaan ti nadakamat a barangay,  mapapati nga inobertekan ti biktima ni Sabalo ngem nakasinnabatna ti Nissan Navarra a minaneho ni Victor Balatico, residente iti Barangay 4, Pasuquin Ilocos Norte, ket nakidinnungpar iti daytoy.

Mapapati a naggapu dagiti dua iti inuman iti Santa Cruz, Ilocos Sur.

Kabayatanna, natay ti maysa a tricycle driver idi nakidinnungpar ti luganna iti maysa a van iti Barangay Balaleng, Bantay, Ilocos Sur.

Natay iti Metro Vigan Cooperative Hospital a nakaitarayanna ti biktima a ni Julius Monson, 33, naasawaan, residente iti nadakamat a barangay idi nakidinnungpar ti traysikelna iti maysa a Lite Ace van a minaneho ti maysa a managan Jeffrey Alabot, 29, residente iti Barangay Quimmarayan, Sto. Domingo, Ilocos Sur.

Naammuan iti report nga agdaldaliasat ti traysikel iti amianan a direksion ket iti nadakamat a barangay, inobertekan ni Monson ti maysa a traysikel ken dyip ngem nakakaut iti bangir a linia ket nakidinnungpar iti sumungad a van.

Nagsagrap ti biktima iti dunor iti ulo ken bagina ket pimmusay iti ospital bayat ti pannakataming dagiti sugatna.

Boluntario a simmuko ni Alabot  iti polis ti Bantay.#

Comments are closed.