Footer

500 a pangganakan a baboy, matartaraken iti BaRang-ay Demo farm

SAN JUAN, Ilocos Sur  – Segun iti project coordinator ti BaRangay demo farm ditoy, imbilin ni Gov. Deogracias Victor Savellano a mapaadu ti bilang dagiti native a pangganakan a baboy sadanto iwaras dagiti burias kadagiti umili a taraknenda tapno manayonan ti pamastrekanda.

Umaboten iti 500 a native a pangganakan a baboy ti matartaraken iti BaRangay Demo Farm iti Barangay Labnig ditoy nga ili ket imbilin ti gobernador a mapaadu iti sangaribu, impalgak ni Dr. Cesar Soller, project coordinator.

Puntiria ti gobierno nasional a mapaadu dagiti baboy tapno maiwaras a livelihood project dagiti agindeg iti probinsia.

Innayon ni Soller a nalaklaka a taraknen dagiti nasao a pangganakan a baboy agsipud ta mangmanganda laeng iti ruot, ngarud basbassit ti magastos iti pannakatarakenda.

Kinuna ti project coordinator a babaen daytoy a programa ti gobierno probinsial, magun-od ti tarigagay ni Savellano nga agbalin ti Ilocos Sur a native hog center iti pagilian.

No umdasen dagiti mapatanor a burias, maiwaras kadagiti nadumaduma nga asosasion dagiti agindeg iti probinsia tapno agbalinda a livelihood project a pamataudanda iti kanayonan a pamastrekanda. kinuna ni Soller.

Kabayatanna, umaboten iti nasurok a maysa a milion dagiti bukel ti mangga a nagatang ti gobierno probinsial, impakaammo ni Maricon Espejo manipud iti opisina ti gobernador.

Maparusing dagitoy a bukel sandanto maiwaras kadagiti nadumaduma nga asosasion iti probinsia tapno maimulada kas paset ti programa ti gobierno probinsial a mangpaberde iti probinsia.

Saan a nagballigi ti napalabas a gannuat ti gobierno probinsial a panaggatang kadagiti bukel ti mangga gapu ta P.10 laeng ti intanggayana kada bukel.

Naruay nga umili ti naawis a nagpidut kadagiti bukel ti Hawaian, Indian ken native a mangga gapu ta P.50 itan ti pinaggatang ti gobierno probinsial kadagitoy.

No naparusingen ti mangga, P1.00 ti pinaggatang ti gobierno probinsial.#