Footer

Acetylene Gang ti nangisayangkat pawnshop robbery: Candon police

CANDON CITY – Dagiti bolt cuttter gang ken acetylene gang ti immuna a suspetsa ti kapolisan ditoy siudad a nangisayangkat iti panagtakaw iti maysa a pawnshop ditoy idi Hunio 7 ket daytoy ti turong ti panagimbestigada, segun iti hepe ti polis ditoy.

Kinuna ni Candon City Chief of Police Marlowe Castillo a nakarekobreda iti plaka ti lugan iti nagtsek-inan dagiti suspek iti panagtakaw iti Wel Gems Pawnshop ket daytoy ti sinursurotda a lead a nagtungpal iti intelligence exchange iti Baguio City police ken nakaammuanda iti kinasiasino ti akinkukua iti plaka ti lugan.

“Na-identify ti akinkukua ti lugan a kameng ti Acetylene Gang,” kinuna ni Castillo.

Agdagup iti nasurok a P1 milion ti pategna nga alahas ken P2,000 a kuarta ti natakaw iti Wel Gems Pawnshop a kukua ni Marilou dela Cruz, 46, residente iti Barangay Tablac ditoy siudad idi Hunio 7.

Dinadael dagiti mannanakaw ti vault sada  kinasakas dagiti  kuarta ken dagiti alahas.

Di pay nabigbig dagiti mannanakaw agsipud ta awan ti CCTV a naikabit iti nasao a pawnshop, awan ti guardia, ken awan ti alarm system daytoy a nagpakdaar koma iti kaadda ti panagtakaw.

Kinuna ni Castillo nga addan naawatda nga intelligence information idi pay la Oktubre 2009 nga adda dagiti nasao a grupo iti siudad ti Candon ket binallaaganda dagiti agtagikua kadagiti business establishments ti panagikabitda iti alarm system ken kamera tapno adda paggudengan dagitoy a grupo a mangisayangkat iti dakes a panggepda.

“Adda intelligence informations nga inted ti intelligence community idi Oktubre 7 nga adda dagiti bolt cutter gang ken acetylene gang ditoy Candon,” kinuna ni Castillo sana innayon a saan a nagkurang ti kapolisan ditoy a nangted iti ballaag kadagiti business establishments a mangikabit iti alarm systems.

Kinuna ni Castillo a napatalgedan ti suspetsada iti kaadda dagiti nasao a grupo iti Candon City idi tsinek-apda ti nagtsek-inan dagitoy a nakaduktalanda kadagiti nabati a ramit dagitoy a tool bars a kas iti pagtubtob iti pader.

“Idi Enero daytoy a tawen, nagpaayabkami iti miting kadagiti pawnshop owners, ken bank managers tapno ma-assess no ania dagiti alarm systems nga us-usarenda ken no ania ti pagkuranganda,” kinuna ni Castillo.

Ngem “…unfortunately, adda dagiti business establishments a di pay nakaikabit iti alarm system agingga a napasamak ti panagtakaw idi Junio 7,” kinuna ni Castillo.

Agtultuloy ti follow-up investigation dagiti polis ditoy para iti pannakatiliw dagiti nagtakaw iti pawnshop.#

Comments are closed.