Footer

Balay ti drug personality nasukisok, droga, kuarta, ramramit ti droga, nakumpiska

BANTAY, Ilocos Sur  – Droga, kuarta ken ramramit iti panagipakete iti droga dagiti nakumpiska dagiti polis iti panagsukisok nga insayangkatda iti balay ti maysa a mapapati a drug personality iti Barangay Buquig ditoy nga ili itay lawasna.

Sinukisok dagiti polis ti balay ni Norlando Lopez, 53, naasawaan, residente iti Barangay Buquig ditoy nga ili idi Hunio 25 ket nakakumpiskada ti 8 a plastic sachet a mapapati a naglaon iti droga nga agdagsen iti 23.1 grams, P32,400 a mapapati a naglakuan iti droga, 1 rolio ti aluminum foil, 9 a lighter, 3 tooter, ken 2 a getteng.

Iggem ti raiding team a pakaibilangan ti Philippine Drug Enforcement Agency, Ilocos Sur, Provincial Anti-Illegal Drug Special Operations Group ken PNP Bantay ti search warrant a pinirmaan ni Judge Francisco Ante, Jr. ti MCTC.

Sinaksian dagiti barangay officials ti Buquig ti panagsukisok dagiti polis iti balay ni Lopez.

Iti pannnakaisurat daytoy, nakadetene ni Lopez iti provincial command ken maisagsagana ti kaso a panagsalungasing iti RA 9165 maikontra kenkuana.#